കബാലിക്ക് വണക്കം ചൊല്ലി മമ്മൂക്കയും ലാലേട്ടനും

സംഗീത സംവിധായകനായ സൂരജ് എസ്.കുറുപ്പാണ് ആല്‍ബം ഒരുക്കിയിരിക്കുന്നത്

കബാലി...ഇന്ത്യക്ക് അകത്തും പുറത്തുമുള്ള ആരാധകര്‍ ആകാംക്ഷയോടെ കാത്തിരിക്കുന്ന രജനി ചിത്രം. തമിഴകം ഒരു ആഘോഷമായി കബാലിയെ മാറ്റുമ്പോള്‍ മലയാളികളും ആരാധനയുടെ കാര്യത്തില്‍ ഒട്ടും പിറകിലല്ല. കബാലിക്ക് സ്വാഗതമേകി ഒരു സംഗീത ആല്‍ബം തന്നെ ഒരുക്കിയിരിക്കുകയാണ് സംഗീത സംവിധായകനായ സൂരജ് എസ്.കുറുപ്പും സുഹൃത്തുക്കളും. സൂപ്പര്‍താരങ്ങളായ മമ്മൂട്ടിയുടെയും മോഹന്‍ലാലിന്റെയും തകര്‍പ്പന്‍ ഡയലോഗുകള്‍ ചേര്‍ത്തു വച്ചാണ് വെല്‍ക്കം സോംഗ് തയ്യാറാക്കിയിരിക്കുന്നത്. ബിഗ് ബി, നരസിംഹം, രാവണപ്രഭു എന്നീ ചിത്രങ്ങളിലെ താരങ്ങളുടെ കയ്യടി നേടിയ ഡയലാഗുകള്‍ കബാലിയിലെ നെരുപ്പ് ഡാ എന്ന ഗാനത്തിനൊപ്പം കൂട്ടിയിണക്കിയിരിക്കുന്നത്. കഴിഞ്ഞ ദിവസം പുറത്തിറങ്ങിയ വീഡിയോ യു ട്യൂബില്‍ ഹിറ്റായിരിക്കുകയാണ്.

തലൈവര്‍ക്ക് കേരളാവിന്‍ വണക്കം' എന്ന ആശയത്തിലാണ് ഈ വീഡിയോ ചെയ്തിരിക്കുന്നതെന്ന് സൂരജ് പറഞ്ഞു. കബാലിയുടെ റിലീസ് ദിനത്തോട് അനുബന്ധിച്ച് പുറത്തിറക്കിയിരിക്കുന്ന വീഡിയോ ദളപതിക്ക് തങ്ങള്‍ അര്‍പ്പിക്കുന്ന ആദരവാണെന്നും സൂരജ് പറഞ്ഞു. ഈയിടെ തിയറ്ററുകളിലെത്തിയ വള്ളീം തെറ്റി,പുള്ളീം തെറ്റി എന്ന ചിത്രത്തിന്റെ സംഗീത സംവിധായകനാണ് സൂരജ്.