'എന്റെ കുടുംബത്തെ ബാധിച്ചു'; ട്രോളുകൾക്കെതിരെ ചഹലിന്റെ ഭാര്യ ധനശ്രീ

ഇന്ത്യൻ ക്രിക്കറ്റ് താരം യുസ്‌വേന്ദ്ര ചഹലും കൊറിയോഗ്രാഫർ ധനശ്രീ വർമ്മയും സമൂഹ മാധ്യമങ്ങളിൽ വൈറൽ ദമ്പതിമാരാണ്. ഇൻസ്റ്റാഗ്രാം റീലുകളിലടക്കം ദമ്പതിമാർ ഒന്നിച്ച് പ്രത്യക്ഷപ്പെടാറുണ്ട്. ഇന്ത്യൻ ദേശീയ ടീമിലും ഇന്ത്യൻ പ്രീമിയർ ലീഗിൽ(ഐപിഎൽ) രാജസ്ഥാൻ റോയൽസിലും കളിക്കുന്ന ലെഗ് സ്പിന്നർ യുസ്വേന്ദ്ര ചഹലിനൊപ്പം ധനശ്രീ വർമ്മ പലപ്പോഴും യാത്ര ചെയ്യാറുണ്ട്.

അതേസമയം, അടുത്തിടെ കൊറിയോഗ്രാഫർ പ്രതീക് ഉതേകറിനൊപ്പമുള്ള ധനശ്രീ വർമ്മയുടെ ഫോട്ടോകളിലൊന്ന് (ഇപ്പോൾ ഡിലീറ്റ് ചെയ്തു) വൈറലായിരുന്നു. ഈ ഫോട്ടോ പ്രസിദ്ധീകരിച്ചതോടെ നിരവധി പേർ ധനശ്രീയെ ട്രോളിയും വിമർശിച്ചും രംഗത്ത് വന്നിരുന്നു.

ഇതോടെ ട്രോളിനെ കുറിച്ച് സമൂഹ മാധ്യമങ്ങളിൽ പോസ്റ്റ് ചെയ്ത വീഡിയോയിലൂടെ തുറന്ന് സംസാരിക്കുകയാണ് ധനശ്രീ. പോസ്റ്റിൽ അവർ പറഞ്ഞു: 'ചോദ്യങ്ങൾ ചോദിക്കാൻ എളുപ്പമാണ്. ആദ്യം ഒരു മനുഷ്യനാകണം, എന്നിട്ട് വിധികളും അഭിപ്രായങ്ങളും മുന്നോട്ട് വയ്ക്കണം'

'ജീവിതത്തിൽ ഒരിക്കലും ട്രോളുകളോ മീമുകളോ എന്നെ ബാധിച്ചിട്ടില്ല, ഈ അടുത്ത കാലത്ത് ഈ ട്രോൾ സംഭവിക്കുന്നത് വരെ അത് അവഗണിക്കുകയോ ചിരിച്ച് ഒഴിവാക്കുകയോ ആണ് ചെയ്യാറുള്ളത്. എന്നാൽ അത് ഇത്തവണ എന്നെ ബാധിച്ചു. കാരണം അത് എന്റെ കുടുംബത്തെയും അടുത്തുള്ളവരെയും പ്രിയപ്പെട്ടവരെയും ബാധിച്ചു.

നിങ്ങൾക്കെല്ലാവർക്കും നിങ്ങളുടെ ഹൃദയത്തിലുള്ളതും സാങ്കൽപ്പിക കാര്യങ്ങളും സമൂഹ മാധ്യമ പ്ലാറ്റ്ഫോമുകളിൽ തുറന്നുപറയാൻ സ്വാതന്ത്ര്യമുള്ളതിനാൽ, ഞങ്ങളുടെയും കുടുംബത്തിന്റെയും വികാരങ്ങൾ നിങ്ങൾ മറക്കുകയോ അവഗണിക്കുകയോ ചെയ്യുന്നു. ഇത് എന്നെ ഒരു തീരുമാനത്തിലേക്ക് നയിച്ചു. സമൂഹ മാധ്യമങ്ങളിൽനിന്ന് വിഷം നീക്കം ചെയ്യുക, എന്നെ വിശ്വസിക്കൂ, അത് വളരെ സമാധാനപരമാണ്' ധനശ്രീ വീഡിയോയിൽ പറഞ്ഞു.

'ഈ മാധ്യമത്തെ നെഗറ്റീവാക്കുകയാണെങ്കിൽ നാം ചെയ്യുന്നത് വിദ്വേഷവും അസ്വാരസ്യവും വലിയ തോതിൽ പ്രചരിപ്പിക്കുകയാണെന്ന് ഇത് എന്നെ മനസ്സിലാക്കി. സമൂഹ മാധ്യമം എന്റെ ജോലിയുടെ പ്രധാന ഭാഗമാണ്, എനിക്കത് ഒഴിവാക്കാൻ കഴിയില്ല. അതിനാലാണ് ഞാൻ ഇന്ന് ധൈര്യം സംഭരിച്ച് ഇൻസ്റ്റാഗ്രാമിലേക്ക് മടങ്ങിവന്നത്. കുറച്ചുകൂടി സെൻസിറ്റീവ് ആയിരിക്കാനും തങ്ങളുടെ കഴിവുകളിലും കഴിവുകളിലും ശ്രദ്ധ കേന്ദ്രീകരിക്കാനും നിങ്ങളോട് അഭ്യർത്ഥിക്കുന്നു, കാരണം എല്ലാത്തിനുമുപരി, നിങ്ങൾക്ക് വിനോദം നൽകാനാണ് ഞങ്ങൾ ഇവിടെയുള്ളത്. നിങ്ങളുടെ അമ്മ, സഹോദരി, സുഹൃത്ത്, ഭാര്യ എന്നിവരെപ്പോലെ ഞാനും ഒരു സ്ത്രീയാണെന്ന് മറക്കരുത്. അങ്ങനെ ചെയ്യുന്നത് ശരിയല്ല. അതിനാൽ സുഹൃത്തുക്കളേ, നിങ്ങൾക്കറിയാം, ഞാൻ ഒരു പോരാളിയാണ്, ഒരിക്കലും തോറ്റ് പിൻവാങ്ങില്ല' ധനശ്രീ വീഡിയോയിൽ വ്യക്തമാക്കി.

ഝലക് ദിഖ്ല ജാ എന്ന ഡാൻസ് റിയാലിറ്റി ഷോയിലൂടെയാണ് ധനശ്രീ വർമ ജനശ്രദ്ധയാകർഷിച്ചത്. ചഹൽ അങ്ങേയറ്റം പിന്തുണച്ചിരുന്നുവെന്നും തന്റെ കഴിവിന്റെ പരമാവധി ചെയ്യാനും ഷോയിൽ മികച്ച പ്രകടനം കാഴ്ചവയ്ക്കാനും തന്നോട് പറഞ്ഞതായും അവർ ഒരു അഭിമുഖത്തിൽ പറഞ്ഞിരുന്നു. രാജസ്ഥാൻ റോയൽസ് നായകൻ സഞ്ജു സാംസണൊപ്പവും അല്ലാതെയും റീലുകൾ ചെയ്ത് ചഹൽ മലയാളികൾക്കിടയിലും സുപരിചിതനാണ്.