ഗൂം ഗൂം.. പാട്ടിന് ചുവടുവെച്ച് മോൺസ്റ്റർ ടീം,മോഹൻലാലിനൊപ്പം വൈശാഖും; ശ്രദ്ധനേടി വീഡിയോ

സൂപ്പർ ഹിറ്റ് ചിത്രമായ പുലിമുരുകന് ശേഷം വൈശാഖും മോഹൻലാലും ഒന്നിച്ച ചിത്രമാണ് 'മോൺസ്റ്റർ'. ഏറെ പ്രതീക്ഷയോടെ കാത്തിരുന്ന ചിത്രം കണ്ടതിന് ശേഷം സമ്മിശ്ര പ്രതികരണമാണ് പ്രേക്ഷകരുടെ ഭാഗത്ത് നിന്നുണ്ടായത്. ചിത്രം റിലീസാകുന്നതിന് മുൻപ് തന്നെ മോൺസ്റ്ററിലെ ആദ്യഗാനം 'ഗൂം ഗൂം..' ശ്രദ്ധനേടിയിരുന്നു. പഞ്ചാബി സ്റ്റൈലിലുള്ള മോഹൻലാലിന്റെ ഡാൻസാണ് സോഷ്യൽ മീഡിയയിൽ ട്രൻഡിങ്ങായത്.

ഇപ്പോഴിതാ ഗാനരംഗത്തിന്റെ ലൊക്കേഷൻ വീഡിയോ പുറത്തുവിട്ടിരിക്കുകയാണ് കൊറിയോഗ്രാഫർ പ്രസന്ന സുജിത്ത്. 'ഇങ്ങനെയാണ് ഞങ്ങൾ പാട്ടിന് പാക്ക് അപ് പറഞ്ഞത് എന്ന അടിക്കുറിപ്പോടെയാണ്‌ പ്രസന്ന വീഡിയോ പങ്കുവെച്ചിരിക്കുന്നത്. പഞ്ചാബ് സ്റ്റൈലിൽ ചുവടുവെക്കുന്ന മോഹൻലാൽ തന്നെയാണ് വീഡിയോയിലെ പ്രധാന ആകർഷണം.

മോഹൻലാലിനൊപ്പം സംവിധായകൻ വൈശാഖ് ചിത്രത്തിലെ മറ്റ് താരങ്ങളായ സുദേവ് നായർ, ഹണിറോസ് എന്നിവരും ചുവടുവെക്കുന്നുണ്ട്. വീഡിയോക്ക് താഴെ നിരവധി ആളുകളാണ് പ്രതികരണവുമായി എത്തിയിരിക്കുന്നത്. പ്രസന്ന കൊറിയോഗ്രാഫി ചെയ്‌ത ഗാനം തിയേറ്ററിലും ആവേശമായിരുന്നു. 

പ്രകാശ് ബാബു, അലി കുലി മിർസ, സിയ ഉൾ ഹാദ് എന്നിവർ ചേർന്നാണ് ഗാനം ആലപിച്ചത്. ഹരി നാരായണൻ്റെ വരികൾക്ക് ദീപക് ദേവ് ആണ് ഈണം നൽകിയിരിക്കുന്നത്. ഗാനത്തിന്റെ ഹിന്ദി ഭാ​ഗം രചിച്ചത് തനിഷ്ക് നബർ ആണ്.

മലയാളത്തിൽ നിന്ന് ആദ്യത്തെ 100 കോടി നേടിയ 'പുലിമുരുകൻ' ടീം ആറ് വർഷങ്ങൾക്ക് ശേഷം വീണ്ടും ഒന്നിച്ച ചിത്രമാണ് മോൺസ്റ്റർ. മോഹൻലാൽ-വൈശാഖ്-ഉദയകൃഷ്ണ കോമ്പോ കൂട്ടുകെട്ട് വീണ്ടും ഒന്നിക്കുമ്പോൾ ഒരു പക്കാ ആക്ഷൻ മാസ് ചിത്രം തന്നെയാണ് ഏവരും പ്രതീക്ഷിച്ചത്. എന്നാൽ മോൺസ്റ്റർ തികച്ചും അപ്രതീക്ഷിത അനുഭവമാണ് പ്രേക്ഷകര്‍ക്ക് നൽകിയിരിക്കുന്നത്. ഒക്ടോബർ 21നായിരുന്നു ചിത്രത്തിന്റെ റിലീസ്.

ലക്കി സിങ് എന്ന കഥാപാത്രമായാണ് മോഹന്‍ലാല്‍ മോണ്‍സ്റ്ററില്‍ എത്തുന്നത്. തെലുങ്ക് നടന്‍ മോഹന്‍ബാബുവിന്‍റെ മകളും നടിയുമായ ലക്ഷ്മി മഞ്ജുവാണ് നായിക. ലക്ഷ്മിയുടെ ആദ്യ മലയാള സിനിമ കൂടിയാണിത്. സുദേവ് നായർ, സിദ്ദിഖ്, ജോണി ആൻ്റണി, കൈലാഷ്, ഗണേഷ് കുമാർ, ബിജു പപ്പൻ, ഹണി റോസ്, ലക്ഷ്മി മഞ്ജു, ലെന, സ്വാസിക എന്നിവര്‍ ചിത്രത്തിലെ മറ്റു പ്രധാന കഥാപാത്രങ്ങളെ അവതരിപ്പിക്കുന്നു.

Full View