'എന്നിലെ അഭിനേതാവിനെ തിരിച്ചറിഞ്ഞ സംവിധായകന്‍, ശ്യാം ബെന​ഗലൊരു ജീനിയസ്': അനുസ്മരിച്ച് മനോജ് ബാജ്പേയി

ന്യൂഡൽഹി: അന്തരിച്ച വിഖ്യാത ചലച്ചിത്രകാരൻ ശ്യാം ബെന​ഗലിനെ അനുസ്മരിച്ച് നടന്‍ മനോജ് ബാജ്പേയ്.

നടനെന്ന നിലയിൽ തന്നെ രൂപപ്പെടുത്തുന്നതിൽ വലിയ സ്വാധീനം ചെലുത്തിയ വ്യക്തിയാണ് ബെന​ഗലെന്ന് ബാജ്പേയ് പറഞ്ഞു. 

'മാണ്ഡി,അങ്കുർ തുടങ്ങിയ ചിത്രങ്ങളിലൂടെ വേറിട്ടൊരു ശൈലിക്ക് തുടക്കമിട്ടയാളാണ് ശ്യാം ബെന​ഗൽ.  രാം ​ഗോപാൽ വർമ വഴിയാണ് അദ്ദേഹം എന്നെ ബന്ധപ്പെടുന്നത്, അദ്ദേഹം എന്ത് വേഷം നൽകിയാലും മറ്റൊന്നും ആലോചിക്കാതെ സ്വീകരിക്കുമായിരുന്നുവെന്നും '- ബാജ്പേയ് വ്യക്തമാക്കി. 

'2001ല്‍ ഇറങ്ങിയ 'സുബൈദ'യിൽ ഫതേഹ്പുർ രാജകുമാരൻ വിജയേന്ദ്ര സിങ്ങിന്റെ വേഷമാണ് ചെയ്യേണ്ടതെന്ന് അറിഞ്ഞപ്പോൾ ഞെട്ടിയിരുന്നു, അദ്ദേഹമൊരു ജീനിയസാണ്. എന്നിലെ അഭിനയ മികവിനാണ് അദ്ദേഹം പ്രാധാന്യം നൽകിയത്. മനോജ് ബാജ്പേയിയാണ് ഈ വേഷം ചെയ്യേണ്ടതെന്ന് അദ്ദേഹത്തിന് നല്ല ബോധ്യമുണ്ടായിരുന്നു. എനിക്കായിരുന്നു എല്ലാ സംശയങ്ങളും'- ബാജ്പേയ് പറഞ്ഞു. 

മനോജ് ബാജ്പേയിയുടെ കരിയറിലെ തന്നെ മികച്ച സിനിമകളിലൊന്നായിരുന്നു 'സുബൈദ'. ഇന്ത്യയിലെ തന്നെ പ്രധാന നടന്മാരിലൊരാളാകാൻ ചിത്രത്തിലൂടെ ബാജ്പേയിക്ക് സാധിച്ചു.  അന്തരിച്ച നടിയും ഗായികയുമായ സുബൈദ ബീഗത്തിന്റെ ജീവിതത്തെ ആസ്പദമാക്കിയൊരുക്കിയ ചിത്രമായിരുന്നു ഇത്. കരിഷ്മ കപൂർ ആയിരുന്നു സുബൈദ ബീ​ഗം എന്ന കഥാപാത്രമായെത്തിയത്. രേഖ, മനോജ് ബാജ്‌പേയി, അമരീഷ് പുരി തുടങ്ങിയവരായിരുന്നു ചിത്രത്തിലെ പ്രധാന താരങ്ങൾ.