ഇനി ആപ്പ് ഡിസൈനര്‍; വാരിസിലെ വിജയ് കഥാപാത്രവും പേരും ഇങ്ങനെ...
ബിഗ് ബജറ്റില്‍ ഒരുങ്ങുന്ന വാരിസില്‍ പ്രകാശ് രാജും ഒരു പ്രധാന കഥാപാത്രത്തെ അവതരിപ്പിക്കുന്നുണ്ട്
Update: 2022-07-21 03:50 GMT
വിജയ് നായകനായി വരുന്ന പുതിയ ചിത്രം വാരിസിലെ കഥാപാത്രത്തിന്‍റെ പേരും മറ്റു വിശദാംശങ്ങളും പുറത്ത്. വംശി പൈഡിപ്പള്ളി സംവിധാനം ചെയ്യുന്ന ചിത്രത്തില്‍ ഫുഡ് ഡിസ്ട്രിബ്യൂഷന്‍ ആപ്പ് ഡിസൈനറുടെ വേഷത്തിലാകും വിജയ് എത്തുക. വിജയ് രാജേന്ദ്രന്‍ എന്ന പേരിലാകും താരം ചിത്രത്തിലെത്തുകയെന്ന് സണ്‍ ന്യൂസ് റിപ്പോര്‍ട്ട് ചെയ്തു.
ശ്രീ വെങ്കിടേശ്വര ക്രിയേഷന്‍സിന്‍റെ ബാനറില്‍ ദേശീയ അവാര്‍ഡ് ജേതാവായ നിര്‍മാതാവ് ദില്‍ രാജുവും ശിരീഷുമാണ് വാരിസ് നിര്‍മിക്കുന്നത്. തമന്നാണ് ചിത്രത്തിനായി സംഗീതം ഒരുക്കുന്നത്. രശ്മിക മന്ദാനയാണ് നായിക. പ്രഭു, ജയസുധ, ശരത്കുമാർ, ഖുശ്ബു, ശ്രീകാന്ത്, ഷാം, സംഗീത കൃഷ്, സംയുക്ത, യോഗി ബാബു തുടങ്ങിയവരും ചിത്രത്തിൽ പ്രധാന താരങ്ങളാണ്. വിജയ്‍യുടെ പിറന്നാളിനോടനുബന്ധിച്ച് പുറത്തിറക്കിയ ചിത്രത്തിന്‍റെ ഫസ്റ്റ് ലുക്ക് പോസ്റ്ററും സെക്കന്‍റ് ലുക്ക് പോസ്റ്ററും വൈറലായിരുന്നു.
ബിഗ് ബജറ്റില്‍ ഒരുങ്ങുന്ന വാരിസില്‍ പ്രകാശ് രാജും ഒരു പ്രധാന കഥാപാത്രത്തെ അവതരിപ്പിക്കുന്നുണ്ട്. പതിമൂന്ന് വര്‍ഷങ്ങള്‍ക്ക് ശേഷം വിജയ്‍യും പ്രകാശ് രാജും ഒന്നിക്കുന്ന ചിത്രം കൂടിയാണ് വാരിസ്. ഗില്ലി, പോക്കിരി എന്നിവയാണ് ഇരുവരും ഒന്നിച്ച ഇതുനു മുമ്പത്തെ സൂപ്പര്‍ ഹിറ്റ് ചിത്രങ്ങള്‍. 2009ല്‍ പ്രഭുദേവ സംവിധാനം ചെയ്ത വില്ലാണ് ഇരുവരും ഒന്നിച്ച അവസാന ചിത്രം.
വിജയ്‍യുടെ അറുപത്തി ആറാമത്തെ ചിത്രമാണ് വാരിസ്. നെല്‍സണ്‍ സംവിധാനം ചെയ്ത ബീസ്റ്റാണ് വിജയ്‍യുടേതായി പുറത്തിറങ്ങിയ അവസാന ചിത്രം. ചിത്രത്തിന് തിയറ്ററുകളില്‍ സമ്മിശ്ര പ്രതികരണമായിരുന്നു ലഭിച്ചിരുന്നത്.