തലൈവര്‍ തലസ്ഥാനത്ത്; പത്തു ദിവസം തിരുവനന്തപുരത്തുണ്ടാകും

തിരുവനന്തപുരം: നടൻ രജനീകാന്ത് തിരുവനന്തപുരം വിമാനത്താവളത്തിലെത്തി. ഇനി 10 ദിവസം തിരുവനന്തപുരത്തുണ്ടാകും. പുതിയ സിനിമയായ 'തലൈവർ 170'ന്‍റെ ചിത്രീകരണത്തിനാണ് തലസ്ഥാനത്ത് എത്തിയത്. അമിതാഭ് ബച്ചന്‍, മഞ്ജു വാര്യര്‍, ഫഹദ് ഫാസില്‍, റാണ ദഗുബാട്ടി എന്നിവരും ചിത്രത്തിലെ മറ്റ് അഭിനേതാക്കൾ. അമിതാഭ് ബച്ചന്‍ ഒഴികെയുള്ളവർ തിരുവനന്തപുരത്തെത്തും.

ജയ് ഭീം സംവിധായകന്‍ ജ്ഞാനവേല്‍ ഒരുക്കുന്ന ചിത്രമാണ് തലൈവര്‍ 170. ലൈക്ക പ്രൊഡക്ഷന്‍സാണ് രജനി ചിത്രം നിർമിക്കുന്നത്.ചിത്രത്തിന്റെ അണിയറപ്രവർത്തകർ ആരൊക്കെയാണെന്നതിലുള്ള ഔദ്യോഗിക പ്രഖ്യാപനം ലൈക പ്രൊഡക്ഷന്‍സ് കഴിഞ്ഞ ദിവസമാണ് നടത്തിയത്.അനിരുദ്ധാണ് ചിത്രത്തിന് സംഗീതം നല്‍കുന്നത്.

മഞ്ജു രജനിക്കൊപ്പം അഭിനയിക്കുന്നതിന്‍റെ ആവേശത്തിലാണ് ആരാധകര്‍.അസുരന്‍ എന്ന ചിത്രത്തില്‍ ധനുഷിനൊപ്പവും തുനിവ് എന്ന സിനിമയില്‍ അജിത്തിനൊപ്പവും മഞ്ജു അഭിനയിച്ചിട്ടുണ്ട്. ഈ രണ്ട് ചിത്രങ്ങളിലെയും നടിയുടെ പ്രകടനം ഏറെ പ്രശംസ നേടിയിരുന്നു.