ഷോട്ട് അവസാനിക്കുന്നു; എമ്പുരാൻ പോസ്റ്റുമായി പൃഥ്വി
മോഹന്‍ലാല്‍-പൃഥ്വിരാജ് കൂട്ടുകെട്ടില്‍ ഒരുങ്ങുന്ന ചിത്രമാണ് എമ്പുരാൻ
Update: 2022-11-07 11:28 GMT
പ്രഖ്യാപനം മുതൽക്കേ ഏറെ പ്രക്ഷകശ്രദ്ധ നേടിയ ചിത്രമാണ് എമ്പുരാൻ. മോഹന്‍ലാല്‍-പൃഥ്വിരാജ് കൂട്ടുകെട്ടില്‍ ഒരുങ്ങുന്ന ചിത്രമെന്നതാണ് അതിന് പ്രധാനകാരണം. എമ്പുരാനുമായി ബന്ധപ്പെട്ട പുതിയ പോസ്റ്റാണ് ഇപ്പോള്‍ സോഷ്യൽ മീഡിയയിൽ ചർച്ചയാവുന്നത്.
തിരക്കഥയുടെ അവസാന ഭാഗത്തിൻറെ ചിത്രമാണ് പൃഥ്വിരാജ് പങ്കുവെച്ചിരിക്കുന്നത്. പോസ്റ്റിന് താഴേ കമൻറുകളുമായി ആരാധകരും എത്തിയിരിക്കുകയാണ്. ക്ലൈമാക്സ് കാണാനുള്ള ആകാംഷയും, ലാലേട്ടൻറെ മികച്ച വേഷത്തിനായുള്ള കാത്തിരിപ്പുമൊക്കെയാണ് കമൻറിലുടനീളം ആരാധകർ പങ്കുവക്കുന്നത്.
മോഹൻലാൽ, പൃഥ്വിരാജ്, തിരക്കഥാകൃത്ത് മുരളിഗോപി, നിർമാതാവ് ആന്റണി പെരുമ്പാവൂർ എന്നിവർ ചേർന്നായിരുന്നു ചിത്രത്തിൻറെ പ്രഖ്യാപനം നടത്തിയത്. എമ്പുരാൻറെ ചിത്രീകരണം 2023 പകുതിയോടെ തുടങ്ങുമെന്ന് റിപ്പോർട്ടുകള്‍ വന്നിരുന്നു. എന്നാലിതുവരെ ഔദ്യോഗിക സ്ഥിരീകരണം വന്നിട്ടില്ല.
2024 പകുതിയോടെ ചിത്രം റിലീസിനെത്തുമെന്നാണ് സൂചന. പാന്‍ വേള്‍ഡ് ചിത്രമായാണ് നിര്‍മ്മാതാക്കള്‍ എമ്പുരാൻ വിഭാവനം ചെയ്യുന്നതെന്ന് മോഹൻലാൽ നേരത്തെ പറഞ്ഞിരുന്നു. അതേ സമയം എമ്പുരാന്‍ ലൂസിഫറിന്റെ രണ്ടാം ഭാഗമല്ല, മൂന്ന് ഭാഗങ്ങളുള്ള സീരീസുകളിലെ രണ്ടാം ചിത്രമാണെന്നും തിരക്കഥാകൃത്ത് മുരളി ഗോപി മുൻപ് പറഞ്ഞിരുന്നു. ഇന്ത്യക്ക് പുറത്ത് വിവിധ ലൊക്കേഷനുകളിലായിരിക്കും എമ്പുരാൻറെ ചിത്രീകരണമെന്നും നേരത്തെ അറിയിച്ചിരുന്നു.