മരിക്കാന്‍ കിടക്കുമ്പോഴും ഫുള്‍ മേക്കപ്പില്‍; മാളവികയുടെ വിമര്‍ശനത്തിനു മറുപടിയുമായി നയന്‍താര
ചിത്രത്തിന്റെ പ്രമോഷന്‍റെ ഭാഗമായി ദിവ്യദര്‍ശിനിക്ക് നല്‍കിയ അഭിമുഖത്തില്‍ നടി മാളവിക മോഹനന്‍ തനിക്കെതിരെ ഉയര്‍ത്തിയ വിമര്‍ശനങ്ങള്‍ക്ക് മറുപടി നല്‍കിയിരിക്കുകയാണ് നയന്‍താര
Update: 2022-12-23 10:19 GMT
ചെന്നൈ: നയന്‍താരയുടെ ഏറ്റവും പുതിയ ചിത്രം 'കണക്ട്' കഴിഞ്ഞ ദിവസമാണ് റിലീസ് ചെയ്തത്. ഹൊറര്‍ വിഭാഗത്തില്‍ പെടുന്ന ചിത്രത്തില്‍ അനുപം ഖേര്‍, സത്യരാജ് എന്നിവരാണ് പ്രധാന കഥാപാത്രങ്ങളെ അവതരിപ്പിച്ചിരിക്കുന്നത്. ചിത്രത്തിന്റെ പ്രമോഷന്‍റെ ഭാഗമായി ദിവ്യദര്‍ശിനിക്ക് നല്‍കിയ അഭിമുഖത്തില്‍ നടി മാളവിക മോഹനന്‍ തനിക്കെതിരെ ഉയര്‍ത്തിയ വിമര്‍ശനങ്ങള്‍ക്ക് മറുപടി നല്‍കിയിരിക്കുകയാണ് നയന്‍താര.
രാജാ റാണി എന്ന ചിത്രത്തിലെ നയന്‍സിന്‍റെ മേക്കപ്പിനെയാണ് മാളവിക വിമര്‍ശിച്ചത്. ആശുപത്രി രംഗത്തില്‍ പോലും ഫുള്‍ മേക്കപ്പാണെന്നായിരുന്നു നടിയുടെ വിമര്‍ശനം. ഇതിനാണ് നയന്‍താര മറുപടി നല്‍കിയിരിക്കുന്നത്.
''ഞാനൊരു സിനിമയില്‍ ഫുള്‍ മേക്കപ്പില്‍ ഇരുന്നതിനെ ഒരു നടി വിമര്‍ശിച്ചു കണ്ടു. അവര്‍ എന്റെ പേര് പരാമര്‍ശിക്കുന്നില്ല. എങ്കിലും അത് എന്നെപ്പറ്റിയാണെന്നു മനസ്സിലായി. ഒരു ആശുപത്രി രംഗത്തില്‍ ഞാന്‍ ഫുള്‍ മേക്കപ്പില്‍ അഭിനയിച്ചെന്നും എന്റെ മുടിയും മുഖവും ഒട്ടും ഉലയാതെ പെര്‍ഫെക്റ്റ് ആയിരുന്നുവെന്നും അവര്‍ പറയുന്നു. ആശുപത്രിയില്‍ ആണെന്നു കരുതി ഒരാള്‍ മുടിയൊക്കെ അലങ്കോലമായി ഇരിക്കണമെന്നുണ്ടോ? ആശുപത്രിയിലും രോഗിയുടെ മുടി വൃത്തിയാക്കി കൊടുക്കാനും നോക്കാനും പരിചരിക്കാനും ആളുണ്ടാകില്ലേ? റിയലിസ്റ്റിക് സിനിമയും വാണിജ്യ സിനിമയും തമ്മില്‍ വലിയ വ്യത്യാസമുണ്ട്. ഒരു റിയലിസ്റ്റിക് സിനിമ ചെയ്യുമ്പോള്‍ യഥാര്‍ഥ ജീവിതത്തില്‍ കാണുന്നതുപോലെ ഒട്ടും മേക്കപ്പില്ലാതെ മുഅഭിനയിക്കേണ്ടി വരും. പക്ഷേ ഒരു വാണിജ്യ സിനിമയില്‍ പ്രേക്ഷകര്‍ക്ക് ഇഷ്ടം തോന്നുന്ന രീതിയിലാണ് മേക്കപ്പ് ചെയ്യുക. ഈ പറഞ്ഞ രംഗം ഒരു വാണിജ്യ സിനിമയിലേതായിരുന്നു. ആ സിനിമയില്‍ സംവിധായകന്‍ പറഞ്ഞ രീതിയിലാണ് ഞാന്‍ അഭിനയിച്ചത്. ഞാന്‍ എപ്പോഴും സംവിധായകനെ അനുസരിക്കുന്ന ആര്‍ട്ടിസ്റ്റാണ്.'' നയന്‍താര പറഞ്ഞു.
വിജയ് ചിത്രം മാസ്റ്ററിന്റെ പ്രമോഷൻ ചടങ്ങിനിടെയായിരുന്നു നയൻതാരയുടെ പേര് എടുത്തു പറയാതെയുള്ള മാളവികയുടെ വിമര്‍ശനം. അടുത്തിടെ ഒരു സൂപ്പര്‍സ്റ്റാര്‍ നടിയുടെ ഒരു സിനിമ ഞാന്‍ കണ്ടു. അവര്‍ ഒരു ആശുപത്രി സീനില്‍ ആയിരുന്നു അഭിനയിക്കുന്നത്. അവിടെ അവര്‍ മരിക്കാന്‍ കിടക്കുകയാണ് പക്ഷെ ആ രംഗത്തില്‍ പോലും ഐലൈനറൊക്കെയിട്ട് അവര്‍ ഫുള്‍ മേക്കപ്പിലായിരുന്നു. ഒരു മുടി പോലും മാറിയിരുന്നില്ല. ഒരു കച്ചവട സിനിമയാണെങ്കില്‍പ്പോലും അഭിനയിക്കുമ്പോള്‍ കുറച്ച് യാഥാര്‍ഥ്യം വേണ്ടേ? മരിക്കാന്‍ കിടക്കുമ്പോള്‍ പോലും ഫുള്‍ മേക്കപ്പില്‍ ഒട്ടും കോട്ടം തട്ടാതെ എങ്ങനെയാണ് അഭിനയിക്കുന്നത്- എന്നാണ് മാളവിക പറഞ്ഞത്.