ദുബൈ ഖിസൈസ് പൊലീസ് സ്റ്റേഷനിലെ പരേഡില്‍ മലയാളികളുടെ പങ്കാളിത്തം
Update: 2018-06-05 15:26 GMT
മലയാളികളുടെ നേതൃത്വത്തിൽ നടന്ന കോൽക്കളിയും ദഫ്മുട്ടും പരേഡിന് കൂടുതൽ പൊലിമ പകർന്നു
യു.എ.ഇ ദേശീയദിനാഘോഷ ഭാഗമായി ദുബൈ ഖിസൈസ് പൊലീസ് സ്റ്റേഷനിൽ പരേഡ് നടന്നു. മലയാളികളുടെ നേതൃത്വത്തിൽ നടന്ന കോൽക്കളിയും ദഫ്മുട്ടും പരേഡിന് കൂടുതൽ പൊലിമ പകർന്നു.
നീളൻ കേക്ക് ഒരുക്കിയും പരേഡ് സംഘടിപ്പിച്ചുമാണ് ദുബൈ ഖിസൈസ് പൊലിസ് സ്റ്റേഷൻ ദേശീയദിനാഘോഷം കെങ്കേമമാക്കിയത്. യു.എ.ഇയിലെ പി.ആർ അസോസിയേഷന്റെ മേൽനോട്ടത്തിലായിരുന്നു കേക്ക് നിർമാണം. ദേശീയ പതാക ഉയർത്തിയും ഷാളുകൾ അണിഞ്ഞും പൊലിസുകാർ ഉൾപ്പെടെ നിരവധി പേർ ആഘോഷ പരിപാടികളിൽ ഭാഗഭാക്കായി. രാജ്യത്തിന്റെ ദേശീയദിനാഘോഷത്തിൽ സജീവമായി പങ്കുചേരാൻ കഴിഞ്ഞതിന്റെ സംതൃപ്തിയിലായിരുന്നു ഖിസൈസ് പൊലീസ് സ്റ്റേഷൻ മേധാവി ബ്രിഗേഡിയർ യൂസുഫ് അബ്ദുല്ല സാലിം അൽ അദീദി.
പൊലീസ് വാഹനത്തിനു പിന്നാലെ അലങ്കരിച്ച വാഹനം പരേഡിൽ ഇടം പിടിച്ചു. തുടർന്ന് ദഫ്, കോൽക്കളി സംഘങ്ങളും പിന്നിലായി യു.എ.ഇ ദേശീയദിനത്തിന് പിന്തുണയേകി സന്നദ്ധ പ്രവർത്തകരും പങ്കുചേർന്നു. രണ്ടു കിലോമീറ്ററോളം സഞ്ചരിച്ചാണ് പരേഡ് തിരികെ ഖിസൈസ് പൊലീസ് സ്റ്റേഷനിൽ സമാപിച്ചത്. കേക്ക് നിർമാണം മുതൽ എല്ലാ ചടങ്ങുകൾക്കും ചുക്കാൻ പിടിച്ചത് മലയാളി കൂട്ടായ്മകളും വ്യക്തികളുമാണ് എന്ന പ്രത്യേകത കൂടിയുണ്ട്.