ഗസ്സയിലേക്ക് ​സഹായം ശേഖരിക്കാൻ 26 കേന്ദ്രങ്ങൾ; നയതന്ത്ര ദൗത്യം ശക്തമാക്കി യു.എ.ഇ

ദുബൈ: ഇഗസ്സയിലെ ആക്രമണം അവസാനിപ്പിക്കാൻ നയതന്ത്ര നീക്കം സജീവമാക്കി യു.എ.ഇ. വിവിധ ലോക നേതാക്കളുമായി യു.എ.ഇ പ്രസിഡൻറ്​ ചർച്ച നടത്തി. മേഖലയിൽ സമാധാനം പുനഃസ്ഥാപിക്കാൻ വൻശക്തി രാജ്യങ്ങൾ ഉണർന്നു പ്രവർത്തിക്കണമെന്നും യു.എ.ഇ നേതാക്കൾ ആവശ്യപ്പെട്ടു.

ഗസ്സയിൽ നിരപാധികൾക്കു നേരെയുള്ള ആക്രമണം അവസാനിപ്പിക്കുക, അടിയന്തരമായി മാനുഷിക സഹായം ഗസ്സയിൽ ലഭ്യമാക്കുക എന്നീ ആവശ്യങ്ങൾ ഉന്നയിച്ചാണ്​ യു.എ.ഇയുടെ നയതന്ത്ര ദൗത്യം. യു.എ.ഇ പ്രസിഡന്റ്​ ശൈഖ്​ മുഹമ്മദ്​ ബിൻ സായിദ്​ ആൽ നഹ്യാൻ വിവിധ ലോക നേതാക്കളുമായി ടെലിഫോണിൽ സംസാരിച്ചു. സ്ഥിതിഗതികളുടെ ഗൗരവം ഉൾക്കൊണ്ട്​ അടിയന്തര നടപടിയാണ്​ വേണ്ടതെന്ന് അദ്ദേഹം വ്യക്​തമാക്കി.

ജോർദാൻ രാജാവ്​ അബ്​ദുല്ല രണ്ടാമൻ, ഈജിപ്​ത്​ പ്രസിഡന്റ് അബ്​ദുൽ ഫത്താഹ്​ അൽസീസി, യൂറോപ്യൻ കമീഷൻ പ്രസിഡന്റ്​ ഉർസുല വോൻ ദെർ ലയൻ, ​ഇ​സ്രായേൽ പ്രധാനമന്ത്രി നെതന്യാഹു എന്നിവരുമായി യു.എ.ഇ പ്രസിഡന്റ്​ ഫോണിൽ സംസാരിച്ചു. ബന്ദികളുടെ മോചനം ഉറപ്പാക്കുക, ആക്രമണം നിർത്തിവെക്കുക, ഗസ്സയിലെ ജനതയ്ക്ക്​ അവശ്യ വസ്​തുക്കളും കുടിവെള്ളവും പുനഃസ്ഥാപിക്കുക എന്നിവയിൽ തീരുമാനം വൈകരുതെന്ന്​ യു.എ.ഇ പ്രസിഡൻറ്​ പറഞ്ഞു. മേഖലയുടെ കെട്ടുറപ്പിനെയും സുരക്ഷയെയും നിലവിലെ സംഘർഷം ബാധിക്കും എന്നിരിക്കെ, കരുതലോടെയുള്ള നടപടികളാണ്​ വേണ്ടതെന്നും യു.എ.ഇ പ്രസിഡന്റ്​ വ്യക്തമാക്കി.

അതിനിടെ, യുദ്ധം ദുരിതം വിതച്ച ഗസ്സയിലേക്ക് ​സഹായ വസ്തുക്കൾ ശേഖരിക്കാൻ യു.എ.ഇയുടെ വിവിധഭാഗങ്ങളിലായി 26 കേന്ദ്രങ്ങൾ തുറന്നു. എമിറേറ്റ്​സ്​ റെഡ്​ക്രസന്റാണ്​സഹായവസ്തുക്കൾ ശേഖരിച്ച്​ ദുരിതമനുഭവിക്കുന്നവർക്ക് ​എത്തിക്കാൻ സംവിധാനം ഒരുക്കിയത്. അബൂദബി, ദുബൈ, റാസൽഖൈമ, ഷാർജ, ഫുജൈറ, അൽ ദഫ്​റ, അജ്​മാൻ, ഉമ്മുൽ ഖുവൈൻ, അൽഐൻ തുടങ്ങി വിവിധ സ്ഥലങ്ങളിലായാണ് ​കേന്ദ്രങ്ങൾ പ്രവർത്തിക്കുന്നത്​. രാവിലെ എട്ടുമുതൽ വൈകുന്നേരം ആറുവരെ ഇവിടെ സഹായ വസ്തുക്കൾ ശേഖരിക്കുമെന്ന്​​റെഡ്​ക്രസന്റ് അധികൃതർ അറിയിച്ചു.