യു.എ.ഇയിൽ അഡ്​നോക്​ പ്രോ ലീഗ്​ മത്സരം നാളെ മുതൽ; കാണികൾക്ക്​ കർശന പെരുമാറ്റച്ചട്ടം

യു.എ.ഇയിൽ അഡ്​നോക്​ പ്രോ ലീഗ്​ മത്സരങ്ങൾ​ നാളെ ആരംഭിക്കുകയാണ്​. കാണികൾക്ക്​ കർശന പെരുമാറ്റ ചട്ടവുമായി അധികൃതർ. കായിക മത്സരങ്ങളിൽ ആവേശം നല്ലതാണെങ്കിലും അക്രമ സംഭവങ്ങൾക്ക്​ ആരും തുനിയരുതെന്ന്​ ദുബൈ പൊലിസ്​ ഓർമിപ്പിച്ചു. കളിക്കളത്തിലും പുറത്തും അക്രമസംഭവങ്ങൾ ആരു നടത്തിയാലും കർശന ശിക്ഷ ഉറപ്പാക്കും. കൃത്യമായ മാർഗനിർദേശങ്ങൾ പാലിച്ചു വേണം കാണികൾ സ്​റ്റേഡിയത്തിലെത്തി തിരിച്ചു പോകേണ്ടതെന്നും പൊലിസ്​ നിർദേശിച്ചു.

കളിക്കളത്തിലും നിയന്ത്രിത സഥലങ്ങളിലും അനുമതി കൂടാതെ കടന്നുകയറാൻ ആരെയും അനുവദിക്കില്ല. കാണികൾ ആയുധങ്ങളോ നിരോധിത വസ്​തുക്കളോ കൈയിൽ വെക്കരുത്​. ഗാലറിയിൽ നിശ്ചിത സീറ്റുകളിൽ വേണം ഇരിക്കാനെന്നും പൊലിസ്​ ആവശ്യപ്പെട്ടു. നിയമലംഘകൾക്ക്​ അയ്യായിരം മുതൽ മുപ്പതിനായിരം വരെ ഫൈനും ഒന്നുമുതൽ മൂന്നു മാസം വരെ തടവും ശിക്ഷ ലഭിക്കുമെന്നും ദുബൈ പൊലിസ്​ അറിയിച്ചു. കളിക്കളത്തിലേക്ക്​ സാധനങ്ങൾ വലിച്ചെറിയുന്നതും കറ്റകരമാണ്​.

കായിക മത്സരത്തെ ആരോഗ്യകരമായി നോക്കി കാണുകയാണ്​ വേണ്ടതെന്ന്​ ദുബൈ പൊലിസ്​ മേധാവി പറഞ്ഞു. മത്സരം മുൻനിർത്തി കർശന സുരക്ഷാ ക്രമീകരണങ്ങളാണ് വിവിധ സ്​​റ്റേഡിയങ്ങളിൽ ഏർപ്പെടുത്തിയിരിക്കുന്നത്​. വിവിധ ക്ലബുകളുടെ ആരാധകർ ചേരിതിരിഞ്ഞ്​ ഗ്രൗണ്ടിലിറങ്ങിയതിനെ തുടർന്ന്​ കഴിഞ്ഞ വർഷം ചില അനിഷ്​ട സംഭവങ്ങൾ റിപ്പോർട്ട്​ ചെയ്​തിരുന്നു. ഈ സാഹചര്യത്തിലാണ്​ പെരുമാറ്റ ചട്ടം കർശനമാക്കാനുള്ള തീരുമാനം.