മൂന്ന്​ വയസിന് മുകളിലുള്ളവർക്ക് കോവിഡ്​ വാക്​സിൻ നൽകാൻ​ ചൈന

കോവിഡ് പ്രതിരോധത്തിന്റെ ഭാ​ഗമായി മൂന്നിനും 17നും ഇടയിൽ പ്രായമുള്ളവരിൽ വാക്​സിൻ നൽകാൻ അംഗീകാരം നൽകി ചൈന. കൊറോണവാകിൻ്റെ​ അടിയന്തര ഉപയോഗത്തിനാണ്​ അംഗീകാരം നൽകിയിരിക്കുന്നത്. ചൈനീസ് കമ്പനിയായ സിനോവാകാണ്​ കൊറോണവാക്​ നിർമിക്കുന്നത്​. അതേസമയം, വാക്​സിൻ എന്നുമുതൽ നൽകും എന്ന കാര്യത്തിൽ തീരുമാനമായിട്ടില്ല.

മൂന്നിനും 17നും ഇടയിൽ പ്രായമുള്ള നിരവധി പേരിൽ കൊറോണവാക് ഒന്നും രണ്ടും ഘട്ട പരീക്ഷണങ്ങൾ നടത്തിയിരുന്നു. മുതിർന്നവരെ പോലെ​ ഇവരിലും വാക്സിൻ സുരക്ഷിതവും കാര്യക്ഷമവുമാണെന്ന് തെളിഞ്ഞിട്ടുണ്ടെന്നാണ് റിപ്പോർട്ടുകൾ. ചൈനയുടെ രണ്ടാമത്തെ കോവിഡ്​ പ്രതിരോധ വാക്​സിനായ കൊറോണവാകിന്​ ജൂൺ ഒന്നിനാണ്​ ലോകാരോഗ്യ സംഘടന അംഗീകാരം നൽകിയത്​. നേരത്തെ, ചൈനയുടെ സിനോഫാർമിന് സമാനമായ അനുമതി ഡബ്ല്യു.എച്ച്​.ഒ നൽകിയിരുന്നു.

ചൈനയിൽ വാക്സിനുകൾ നൽകുന്നതിന്​ പുറമെ വിവിധ രാജ്യങ്ങളിലേക്കും​ ഈ വാക്​സിനുകൾ കയറ്റി അയക്കുന്നുണ്ട്​. ഇതുവരെ ചൈനയിലുടനീളം 763 ദശലക്ഷം ഡോസ് കോവിഡ് പ്രതിരോധ വാക്​സിൻ നൽകിയിട്ടുണ്ടെന്ന് ചൈനയിലെ ദേശീയ ആരോഗ്യ കമീഷൻ അറിയിച്ചു