മനയത്ത് ചന്ദ്രന്‍ ജെഡിയു കോഴിക്കോട് പ്രസിഡന്റ്
ജെ ഡി യു കോഴിക്കോട് ജില്ലാ തെരഞ്ഞെടുപ്പില്‍ വീരേന്ദ്രകുമാര്‍ പക്ഷത്തിന് തോല്‍വി
ജെ ഡി യു കോഴിക്കോട് ജില്ലാ തെരഞ്ഞെടുപ്പില്‍ വീരേന്ദ്രകുമാര്‍ പക്ഷത്തിന് തോല്‍വി. ഔദ്യോഗിക സ്ഥാനാര്‍ത്ഥിയായ വി കുഞ്ഞാലിയെ വോട്ടെടുപ്പിലൂടെ പരാജയപ്പെടുത്തിയാണ് മനയത്ത് ചന്ദ്രനെ പ്രസിഡന്‍റായി തെരഞ്ഞെടുത്തത്. പ്രവര്‍ത്തകരുടെ വികാരം മാനിക്കാത്തവര്‍ക്കുളള മറുപടിയാണ് തന്‍റെ വിജയമെന്ന് മനയത്ത് ചന്ദ്രന്‍ പറഞ്ഞു.
കഴിഞ്ഞ നിയമസഭാ തെരഞ്ഞെടുപ്പില്‍ മത്സരിക്കാനാണ് അന്നത്തെ ജില്ലാ പ്രസിഡന്‍റായിരുന്ന മനയത്ത് ചന്ദ്രന്‍ രാജിവെച്ചത്. തെരഞ്ഞെടുപ്പില്‍ തോറ്റതിനെ തുടര്‍ന്ന് ജില്ലാ പ്രസിഡന്റ് സ്ഥാനം മനയത്ത് ചന്ദ്രന്‍ വീണ്ടും ആവശ്യപ്പെട്ടെങ്കിലും സംസ്ഥാനകമ്മിറ്റി തയ്യാറായിരുന്നില്ല. പകരം ചുമതല സംസ്ഥാന സെക്രട്ടറി വി കുഞ്ഞാലിക്ക് നല്കി. തുടര്‍ന്ന് നടന്ന തെരഞ്ഞെടുപ്പിലാണ് കുഞ്ഞാലിയെ തോല്‍പ്പിച്ച് മനയത്ത് ചന്ദ്രന്‍ പ്രസിഡന്‍റാകുന്നത്. തന്നെ മാറ്റിയതെന്തിനാണെന്ന് സംസ്ഥാന നേതൃത്വം മറുപടി പറയണമെന്ന് മനയത്ത് ചന്ദ്രന്‍ പറഞ്ഞു
അടുത്ത മാസം രണ്ടിനാണ് സംസ്ഥാന പ്രസിഡന്റ് സ്ഥാനത്തേക്കുളള തെരഞ്ഞെടുപ്പ്. ഔദ്യോഗിക പക്ഷത്തിനെതിരെ രംഗത്തിറങ്ങാനാണ് മനയത്ത് ചന്ദ്രനെ അനുകൂലിക്കുന്നവരുടെ തീരുമാനം.