കണ്ണൂരില്‍ പ്രചരണത്തിന് ലീഗ് സജീവമല്ല; കോണ്‍ഗ്രസ് ആശങ്കയില്‍
Update: 2018-05-08 21:29 GMT
സതീശന്‍ പാച്ചേനിയുടെ തെരഞ്ഞെടുപ്പ് പ്രചരണ രംഗത്ത് ലീഗ് പ്രവര്‍ത്തകര്‍ സജീവമാകാത്തതാണ് കോണ്‍ഗ്രസിനെ ആശങ്കയിലാക്കുന്നത്.
കണ്ണൂര്‍ നിയമസഭാമണ്ഡലത്തില്‍ ലീഗ് നിലപാട് നിര്‍ണായകമാകുന്നു. സതീശന്‍ പാച്ചേനിയുടെ തെരഞ്ഞെടുപ്പ് പ്രചരണ രംഗത്ത് ലീഗ് പ്രവര്‍ത്തകര്‍ സജീവമാകാത്തതാണ് കോണ്‍ഗ്രസിനെ ആശങ്കയിലാക്കുന്നത്. പി കെ രാഗേഷ് വിഷയത്തിലടക്കം സതീശന്‍ പാച്ചേനി സ്വീകരിച്ച നിലപാടുകള്‍ തിരിച്ചടിയാകുമെന്നും വിലയിരുത്തലുണ്ട്.
അബ്ദുളളക്കുട്ടിയെ നീക്കി കണ്ണൂര്‍ സീറ്റ് സതീശന്‍ പാച്ചേനിക്ക് നല്കിയതിനെതിരെ ആദ്യം പരസ്യമായി എതിര്‍പ്പുയര്‍ത്തിയത് യൂത്ത് ലീഗായിരുന്നു. കഴിഞ്ഞ തദ്ദേശ ഭരണ തെരഞ്ഞെടുപ്പില്‍ വിമതനായി മത്സരിച്ച പി.കെ രാഗേഷിന് രഹസ്യപിന്തുണ നല്‍കിയത് സതീശന്‍ പാച്ചേനിയടക്കമുളള എ ഗ്രൂപ്പ് നേതാക്കളാണെന്നും ഇത് ലീഗ് സ്ഥാനാര്‍ഥികളുടെ പരാജയത്തിനും കോര്‍പ്പറേഷന്‍ ഭരണം കൈവിട്ടുപോകാനും കാരണമായെന്നും ചൂണ്ടിക്കാട്ടിയായിരുന്നു യൂത്ത് ലീഗിന്റെ പ്രതിഷേധം. എന്നാല്‍ നേതാക്കളിടപെട്ട് പ്രതിഷേധം തണുപ്പിച്ചെങ്കിലും സതീശന്റെ തെരഞ്ഞെടുപ്പ് പ്രചാരണ പ്രവര്‍ത്തനങ്ങളില്‍ ലീഗ് പ്രവര്‍ത്തകര്‍ സജീവമാകാത്തതാണ് യു.ഡി.എഫ് നേതൃത്വത്തെ വലക്കുന്നത്. എന്നാല്‍ ഡപ്യൂട്ടി മേയര്‍ സ്ഥാനം ആവശ്യപ്പെട്ട രാഗേഷിനെ കോണ്‍ഗ്രസ് കയ്യൊഴിഞ്ഞതോടെ സതീശനെതിരായ പ്രതിഷേധങ്ങളും അവസാനിച്ചെന്നാണ് യൂത്ത് ലീഗ് നേതൃത്വം പറയുന്നത്
തെരഞ്ഞെടുപ്പ് പ്രവര്‍ത്തനവുമായി ബന്ധപ്പെട്ട് പാച്ചേനിയുടെ പ്രവര്‍ത്തനങ്ങള്‍ ഏകപക്ഷീയമാണെന്ന് ലീഗ് നേതാക്കള്‍ കഴിഞ്ഞ ദിവസം രമേശ് ചെന്നിത്തലയോട് നേരിട്ട് പരാതിപ്പെട്ടിരുന്നു. അവസാന നിമിഷം ഗ്രൂപ്പ് മാറിയ പാച്ചേനിയോട് എ വിഭാഗത്തിനും കടുത്ത എതിര്‍പ്പാണുളളത്. ഇതും തെരഞ്ഞെടുപ്പില്‍ തിരിച്ചടിയായേക്കാമെന്നാണ് വിലയിരുത്തല്‍. സീറ്റിനായി ഐ വിഭാഗത്തിലേക്ക് ചേക്കേറിയ സതീശന്‍ പാച്ചേനിയെ ഐ വിഭാഗവും പൂര്‍ണമായി ഉള്‍ക്കൊണ്ടിട്ടിട്ടില്ല എന്നാണ് സൂചന.