തെരഞ്ഞെടുപ്പ് പ്രചാരണം അവസാനഘട്ടത്തിലേക്ക്; ചേലക്കരയില്‍ അരയും തലയും മുറുക്കി മുന്നണികള്‍

തൃശൂര്‍: തെരഞ്ഞെടുപ്പ് പ്രചാരണം അവസാനഘട്ടത്തിലേക്ക് കടന്നതോടെ ചേലക്കരയില്‍ മുന്നണികള്‍ക്കിടയിലും ആവേശം. എൽഡിഎഫ് സ്ഥാനാർഥി യു.ആർ പ്രദീപിന്റെ റോഡ് ഷോ ഇന്ന് നടക്കും. പരിപാടിയിൽ മുൻ എംഎൽഎ കെ. രാധാകൃഷ്ണനും പങ്കെടുക്കും. പ്രതിപക്ഷ നേതാവ് വി.ഡി സതീശന്റെ നേതൃത്വത്തിൽ യുഡിഎഫിന്റെ തെരഞ്ഞെടുപ്പ് അവലോകനയോഗവും ഇന്നു നടക്കും.

രാധാകൃഷ്ണൻ തെരഞ്ഞെടുപ്പ് പ്രചാരണത്തിൽ സഹകരിക്കുന്നില്ലെന്ന പ്രദീപിന്‍റെ പരാതി നേരത്തെ ചർച്ചയായിരുന്നു. ഇക്കാര്യം പ്രദീപും പാർട്ടി നേതൃത്വവും പിന്നീട് നിഷേധിച്ചു.

അതിനിടെ, ചെറുതുരുത്തി നഗരത്തിലുണ്ടായ സംഘർഷത്തിൽ യൂത്ത് കോൺഗ്രസ് പ്രവർത്തകര്‍ക്കെതിരായ മർദനത്തില്‍ പൊലീസ് നാലു കേസുകൾ രജിസ്റ്റർ ചെയ്തു. വള്ളത്തോൾ നഗർ പഞ്ചായത്ത് പ്രസിഡന്റ് ഷെയ്ഖ് അബ്ദുൽ ഖാദർ ഉൾപ്പെടെ നാലുപേർക്കെതിരെയാണ് കേസ്. അനുവാദമില്ലാതെ പ്രകടനം നടത്തിയതിനും പൊലീസ് സ്റ്റേഷന് മുമ്പിൽ ഉന്തും തള്ളും നടത്തിയതിനും സിപിഎം-കോൺഗ്രസ് പ്രവർത്തകർക്കെതിരെയും നടപടിയുണ്ട്.