മലപ്പുറത്തുകാരിയുമായി യു.പിക്കാരന്റെ ഇൻസ്റ്റഗ്രാം പ്രണയം; പെൺകുട്ടിയുമായി നാട്ടിലേക്ക് തിരിച്ച 18കാരൻ അറസ്റ്റിൽ

മലപ്പുറം: ഇൻസ്റ്റഗ്രാമിൽ പരിചയപ്പെട്ട 16കാരിയുമായി നാട്ടിലേക്ക് കൂട്ടികൊണ്ടുപോകുന്നതിനിടെ യു.പി സ്വദേശി അറസ്റ്റിൽ. മലപ്പുറം കരുവാരക്കുണ്ട് സ്വദേശിനിയെ ട്രെയിനിൽ കൂട്ടിക്കൊണ്ടുപോകുന്നതിനിടെയാണ് നോയിഡ സ്വദേശി മുഹമ്മദ് നവേദ് എന്ന 18കാരൻ പിടിയിലായത്.

16കാരിയുമായി ഇൻസ്റ്റഗ്രാമിലൂടെ പ്രണയത്തിലായ പ്രതി 15 ദിവസം മുൻപ് കരുവാരക്കുണ്ടിലെത്തിയിരുന്നു. പ്രണയാഭ്യർത്ഥനയുമായി പെൺകുട്ടിയുടെ വീട്ടിൽചെന്നെങ്കിലും വീട്ടുകാർ എതിർത്തു. ഇതോടെ കഴിഞ്ഞ ദിവസം പെൺകുട്ടിയെ കൂട്ടിക്കൊണ്ടുപോകുകയായിരുന്നു. കോളേജിലേക്കെന്നു പറഞ്ഞാണ് പെൺകുട്ടി വീട്ടിൽനിന്ന് ഇറങ്ങിയത്.

പിന്നീട് പെൺകുട്ടിയെ കാണാനില്ലെന്ന് ബന്ധുക്കൾ കരുവാരക്കുണ്ട് പൊലീസിൽ പരാതി നൽകിയത്. തുടർന്ന് നടത്തിയ അന്വേഷണത്തിൽ കാസർകോട്ടുനിന്നാണ് ഇരുവരെയും കണ്ടെത്തിയത്. കോഴിക്കോട്ടുനിന്ന് ഡൽഹിയിലേക്കുള്ള യാത്രാമധ്യേയാണ് ഇരുവരും പൊലീസ് പിടിയിലാകുന്നത്.

കാസർകോട് പൊലീസ് കസ്റ്റഡിയിലെടുത്ത ഇരുവരെയും കരുവാരക്കുണ്ട് പൊലീസിനു കൈമാറുകയായിരുന്നു. പ്രതിക്കെതിരെ പോക്‌സോപ്രകാരം കേസെടുത്ത് മഞ്ചേരി കോടതിയിൽ ഹാജരാക്കി റിമാൻഡ് ചെയ്തു.

Summary: 18-year-old Muhammad Naved from Noida, UP, was arrested while taking a 16-year-old girl from Karuvarakundu, Malappuram, who fell in love on Instagram