കുടുംബം മുഴുവൻ പാട്ടുകാരായി; ട്രെൻഡിങ്ങിൽ ഇടംപിടിച്ച് ദാന റാസിഖിന്റെ 'റൂഹേ മർദം'

പിന്നണി ഗായിക ദാന റാസിഖും കുടുംബവും യൂട്യൂബ് ട്രെന്‍ഡിങ്ങില്‍ ഇടം പിടിച്ചിരിക്കുകയാണ്. 'റൂഹേ മര്‍ദം' എന്ന ഖവാലി ഗാനം സോഷ്യല്‍ മീഡിയയില്‍ ഇപ്പോള്‍ വൈറലാണ്. ദാനയുടെ കുടുംബാം​ഗങ്ങളാണ് ഈ വേറിട്ട സം​ഗീത ഉദ്യമത്തിന് പിന്നിൽ പ്രവർത്തിച്ചിരിക്കുന്നത്.

പിതാവ് അബ്ദുള്‍ റാസിഖ്, സഹോദരങ്ങളായ റഫ റാസിഖ്, ദുര്‍റ റാസിഖ് തുടങ്ങിയവര്‍ ഈ ഖവാലി ഗാനത്തിന്റെ മധുരസ്വരമായി പിന്നണിയിലുണ്ട്. ദാനയുടെ പങ്കാളി അഷ്ഫാഖ് അഹമ്മദാണ് ഗാനത്തിന്റെ വരികള്‍ എഴുതിയിരിക്കുന്നത്. റഫ റാസിഖ്, ഫഹീദ് അലി എന്നിവര്‍ ചേര്‍ന്നാണ് സംഗീതം നിര്‍വഹിച്ചിരിക്കുന്നത്. ഗാനത്തിന്റെ ഓര്‍ക്കസ്‌ട്രേഷനു പിന്നില്‍ റോഷന്‍ ഹാരിസ് ആണ്.