ബംഗളൂരുവില്‍ ഓടിക്കൊണ്ടിരുന്ന ബസിന് തീപിടിച്ച് മൂന്നു പേര്‍ മരിച്ചു
Update: 2018-05-13 14:37 GMT
16 യാത്രക്കാരാണ് ബസിലുണ്ടായിരുന്നതെന്നും അപകടത്തില്‍ ഏതാനും പേര്‍ക്ക് പരിക്കേറ്റതായും പൊലീസ് അറിയിച്ചു.
ബംഗളൂരു - ഹുബ്ലി ധര്‍വാഡ് പാതയില്‍ ഓടിക്കൊണ്ടിരുന്ന സ്വകാര്യ ബസിന് തീപിടിച്ച് മൂന്നു യാത്രക്കാര്‍ മരിച്ചു. വരൂരിന് സമീപമായിരുന്നു അപകടം. 16 യാത്രക്കാരാണ് ബസിലുണ്ടായിരുന്നതെന്നും അപകടത്തില്‍ ഏതാനും പേര്‍ക്ക് പരിക്കേറ്റതായും പൊലീസ് അറിയിച്ചു. ബസില്‍ മദ്യക്കുപ്പികളും സിഗരറ്റും വേഗത്തില്‍ തീപിടിക്കുന്ന പദാര്‍ഥങ്ങളുമുണ്ടായിരുന്നതായും ഇതാണ് തീപിടിത്തത്തിന് കാരണമെന്ന് കരുതുന്നതായും പൊലീസ് പറയുന്നു. മൂന്നു മൃതദേഹങ്ങളും കത്തിക്കരിഞ്ഞ നിലയിലാണ്. മരിച്ചവരെ തിരിച്ചറിഞ്ഞിട്ടില്ലെന്ന് പൊലീസ് അറിയിച്ചു. സംഭവത്തെക്കുറിച്ച് അന്വേഷണം പുരോഗമിക്കുകയാണെന്നും പൊലീസ് കൂട്ടിച്ചേര്‍ത്തു.