ജിഗ്നേഷ് മേവാനിയുടെ തെരഞ്ഞെടുപ്പ് പ്രചരണം: അരുന്ധതി റോയ് 3 ലക്ഷം സംഭാവന നല്‍കി
Update: 2018-05-28 21:25 GMT
ഗുജറാത്ത് തെരഞ്ഞെടുപ്പില്‍ സ്വതന്ത്രനായി മത്സരിക്കുന്ന ദലിത് നേതാവ് ജിഗ്നേഷ് മേവാനിക്ക് എഴുത്തുകാരിയും സാമൂഹ്യപ്രവര്‍ത്തകയുമായ അരുന്ധതി റോയിയുടെ പിന്തുണ.
ഗുജറാത്ത് തെരഞ്ഞെടുപ്പില്‍ സ്വതന്ത്രനായി മത്സരിക്കുന്ന ദലിത് നേതാവ് ജിഗ്നേഷ് മേവാനിക്ക് എഴുത്തുകാരിയും സാമൂഹ്യപ്രവര്‍ത്തകയുമായ അരുന്ധതി റോയിയുടെ പിന്തുണ. മേവാനിയുടെ തെരഞ്ഞെടുപ്പ് പ്രചരണത്തിനായി അരുന്ധതി മൂന്ന് ലക്ഷം രൂപ സംഭാവന നല്‍കി. തെരഞ്ഞെടുപ്പ് പ്രചരണത്തിന് പണം സ്വരൂപിക്കാന്‍ മേവാനി ക്രൗഡ്ഫണ്ടിങ് കാംപയിന്‍ നടത്തുന്നതിനിടയിലാണ് അരുന്ധതി റോയ് സംഭാവന നല്‍കിയത്.
മുഖ്യധാരാ രാഷ്ട്രീയത്തിലേക്ക് പ്രതിബന്ധങ്ങള്‍ തകര്‍ത്ത് മുന്നേറുകയാണ് ജിഗ്നേഷ് മേവാനിയെന്ന് അരുന്ധതി റോയി പ്രതികരിച്ചു. താഴേത്തട്ടില്‍ നിന്ന് ഉയര്‍ന്നുവരുന്നവരോടുള്ള ഐക്യദാര്‍ഢ്യമെന്ന നിലയിലാണ് താന്‍ മേവാനിക്ക് സംഭാവന നല്‍കിയതെന്നും അരുന്ധതി പറഞ്ഞു.
ക്രൌഡ് ഫണ്ടിംഗിലൂടെ ഒന്‍പത് ലക്ഷത്തിലധികം രൂപ മേവാനി സ്വരൂപിച്ചുകഴിഞ്ഞു. 100 രൂപ മുതലാണ് സംഭാവന സ്വീകരിക്കുന്നത്. 248 പേരാണ് ഇതുവരെ സംഭാവന നല്‍കിയത്. ജാതി വിവേചനത്തിനും മാറ്റിനിര്‍ത്തപ്പെടലിനുമെതിരെ പോരാടാന്‍ തനിക്ക് പിന്തുണ നല്‍കൂ എന്നാണ് മേവാനിയുടെ അഭ്യര്‍ഥന. കോണ്‍ഗ്രസിന്റെ സിറ്റിങ് സീറ്റായ വാദ്ഗാം മണ്ഡലത്തില്‍ നിന്നാണ് മേവാനി ജനവിധി തേടുന്നത്.