മറ്റ് കുട്ടികള്‍ക്കൊപ്പം കളിച്ചതിന് പിതാവ് മക്കളെ ചുട്ടുപഴുത്ത ഇരുമ്പ് ദണ്ഡ് കൊണ്ട് പൊള്ളിച്ചു
ആദ്യം റബ്ബര്‍ ട്യൂബ് കൊണ്ട് അടിച്ച ശേഷമായിരുന്നു ഇരുമ്പ് ദണ്ഡ് കൊണ്ടുള്ള ആക്രമണം
മറ്റ് കുട്ടികളുടെ കൂടെ കളിച്ചതിന് പിതാവ് പെണ്‍മക്കളെ ചുട്ടുപഴുത്ത ഇരുമ്പ് ദണ്ഡ് കൊണ്ട് പൊള്ളിച്ചു. രാജസ്ഥാനില്‍ വ്യാഴാഴ്ച രാത്രിയാണ് സംഭവം നടന്നത്. കൂലിപ്പണിക്കാരനായ പപ്പുലാലാണ് മക്കളായ നിഷ(13) ഊര്‍മ്മിള(11) എന്നിവരെ ഉപദ്രവിച്ചത്. ആദ്യം റബ്ബര്‍ ട്യൂബ് കൊണ്ട് അടിച്ച ശേഷമായിരുന്നു ഇരുമ്പ് ദണ്ഡ് കൊണ്ടുള്ള ആക്രമണം.
കൈകാലുകളിലും പുറത്തും ഗുരുതരമായി പൊള്ളലേറ്റ കുട്ടികളെ സംഭവത്തിന് ശേഷം മുറിയില്‍ പൂട്ടിയിട്ട ശേഷം പപ്പുലാലും ഭാര്യയും ജോലിക്ക് പോവുകയും ചെയ്തു. പെണ്‍കുട്ടികളുടെ കരച്ചില്‍ കേട്ട അയല്‍ക്കാര്‍ വീട്ടിലെത്തി അന്വേഷിച്ചപ്പോഴാണ് സംഭവം പുറംലോകമറിയുന്നത്. ഉടന്‍ പൊലീസെത്തി കുട്ടികളെ മോചിപ്പിക്കുകയും ആശുപത്രിയില്‍ പ്രവേശിപ്പിക്കുകയും ചെയ്തു. ജുവനൈല്‍ ജസ്റ്റിസ് നിയമപ്രകാരം പപ്പുലാലിനെ അറസ്റ്റ് ചെയ്തതായി പൊലീസ് പറഞ്ഞു. സംഭവത്തില്‍ കുട്ടികളുടെ മാതാവിന്റെ പങ്ക് അന്വേഷിച്ചു വരികയാണ്.