ആംബുലന്‍സില്‍ കോവിഡ് രോഗി; ജ്യൂസ് കുടിക്കാന്‍ വഴിയോരത്തു നിര്‍ത്തി ആരോഗ്യപ്രവര്‍ത്തകന്‍- വീഡിയോ കാണാം
പി.പി.ഇ കിറ്റ് ധരിച്ചുനിൽക്കുന്ന ആരോഗ്യപ്രവർത്തകൻ തന്‍റെ മാസ്ക് പോലും കൃത്യമായി ധരിച്ചിട്ടില്ല.
രാജ്യത്ത് കോവിഡിന്‍റെ രണ്ടാം തരംഗം രൂക്ഷമാവുകയാണ്. തുടക്കത്തിലെന്ന പോലെ കോവിഡ് ജാഗ്രത നിര്‍ദേശങ്ങള്‍ ഗൗരവത്തോടെ സമീപിക്കാത്തത് രണ്ടാം ഘട്ട വ്യാപനത്തിന്‍റെ വ്യാപ്തി വര്‍ധിക്കാന്‍ കാരണമായിട്ടുണ്ട്. ഈ സാഹചര്യത്തിൽ ഭോപ്പാലിൽ നിന്നുപുറത്തുവരുന്ന ഒരു വീഡിയോ വൈറലാവുകയാണ്.
കോവിഡ് രോഗിയെക്കൊണ്ടുപോകുന്ന ആംബുലന്‍സ് വഴിയോരത്തുനിര്‍ത്തി ജ്യൂസ് ഓര്‍ഡര്‍ ചെയ്യുന്ന ആരോഗ്യപ്രവര്‍ത്തകനാണ് വീഡിയോയിലുള്ളത്. സഹ്ദോൽ ജില്ലയിൽ നിന്നാണ് വീഡിയോ പുറത്തുവന്നിരിക്കുന്നത്. പി.പി.ഇ കിറ്റ് ധരിച്ചുനിൽക്കുന്ന ആരോഗ്യപ്രവർത്തകൻ തന്‍റെ മാസ്ക് പോലും കൃത്യമായി ധരിച്ചിട്ടില്ലെന്നത് സംഭവത്തിന്‍റെ ഗൗരവം വര്‍ധിപ്പിക്കുന്നു.
മാസ്ക് താടിയിലേക്ക് താഴ്ത്തിവെച്ചാണ് ആരോഗ്യപ്രവര്‍ത്തകന്‍ ജ്യൂസ് ഓര്‍ഡര്‍ ചെയ്യുന്നത്. നിങ്ങൾ കൊറോണ രോഗിയെ കൊണ്ടു പോവുകയല്ലേ, മാസ്ക് നേരെയിടൂ എന്ന് വീഡിയോ പകര്‍ത്തുന്നയാള്‍ ഇയാളോട് ചോദിക്കുന്നുണ്ട്. അപ്പോഴാണയാള്‍ മാസ്ക് നേരെയിടുന്നത്. തനിക്ക് കൊറോണയില്ലെന്നും താൻ രോഗിയെ കൊണ്ടുപോവുക മാത്രമേ ചെയ്യുന്നുള്ളൂ എന്നുമാണ് ആരോഗ്യപ്രവര്‍ത്തകന്‍ മറുപടി നല്‍കുന്നത്.
കേന്ദ്ര ആരോഗ്യവകുപ്പിന്റെ കണക്കുകൾ പ്രകാരം രാജ്യത്ത് ഏറ്റവുമധികം കോവിഡ് കേസുകളുള്ള പത്തു സംസ്ഥാനങ്ങളിലൊന്നാണ് മധ്യപ്രദേശ്. നിലവിലെ ആശങ്കാജനകമായ സാഹചര്യത്തില്‍ ഉത്തരവാദിത്വപ്പെട്ടവരില്‍ നിന്നുള്ള ഇത്തരം വീഴ്ചകള്‍ തള്ളിക്കളയാനാകില്ല.
शहडोल में कुछ स्वास्थ्यकर्मी एक #कोरोना संक्रमित को लेकर खुलेआम शहर के बीच घूमते नजर आए, यही नही कोरोना संक्रमित को लेकर शहर के बीच गन्ने के जूस का आनंद लेते रहे @ndtv @ndtvindia #COVID19India pic.twitter.com/Qg07TcR6ei
— Anurag Dwary (@Anurag_Dwary) April 9, 2021