വീട്ടിലിരിക്കൂ, ആഹ്ലാദപ്രകടനങ്ങൾ വേണ്ട; ഹാട്രിക് വിജയത്തിലും സമചിത്തതയോടെ മമത

തെരഞ്ഞെടുപ്പ് ഫലം ബംഗാളിന്റെ വിജയമാണെന്നു മമത ബാനർജി. എല്ലാവരും കഠിനാധ്വാനം ചെയ്തതിന്റെ ഫലമാണിതെന്നും മമത പറഞ്ഞു.

അതേസമയം, മിന്നുന്ന വിജയത്തിനിടയിലും ആഹ്ലാദ പ്രകടനങ്ങൾ ഒഴിവാക്കാൻ പ്രവർത്തകരോട് ആഹ്വാനം ചെയ്തിരിക്കുകയാണ് മമത. എല്ലാവരും വീട്ടിലിരിക്കുക. എവിടെയും കൂട്ടംകൂടരുത്. എല്ലാവരും കോവിഡ് ചട്ടങ്ങൾ പാലിക്കുക. ആരും ആഹ്ലാദ പ്രകടനങ്ങൾ നടത്തരുത്-കൊൽക്കത്തയിൽ തന്റെ വസതിയിൽ വച്ച് മമത പ്രവർത്തകരോട് ആഹ്വാനം ചെയ്തു. തെരഞ്ഞെടുപ്പ് പ്രചാരണത്തിനിടെ കണങ്കാലിനേറ്റ പരിക്കിനു ശേഷം ഇതാദ്യമായാണ് അവർ പുറത്തുവന്ന് പ്രവർത്തകരെ അഭിനന്ദിച്ചത്. ഏതാനും തെരഞ്ഞെടുപ്പ് പരിപാടികളില്‍ സ്ട്രെച്ചറില്‍ പങ്കെടുത്തിരുന്നെങ്കിലും ഇതിനു ശേഷം വിശ്രമത്തിലായിരുന്നു. 

200ലേറെ സീറ്റിന്റെ മൃഗീയ ഭൂരിപക്ഷത്തിന്റെ പിറകെയും അമിത ആഹ്ലാദങ്ങളൊന്നുമില്ലാതെയാണ് അവർ കാണപ്പെട്ടത്. രാജ്യം നേരിടുന്ന വലിയ മഹാമാരിക്കിടയിൽ ആഹ്ലാദാരവങ്ങൾ മുഴക്കേണ്ട സമയമല്ല ഇതെന്ന് പ്രവർത്തകരെ ഉണർത്തുകയായിരുന്നു അവർ ചെയ്തത്.