ഇംഗ്ലീഷ് പ്രീമിയര്‍ ലീഗില്‍ വമ്പന്‍മാര്‍ക്ക് ജയം
ഇംഗ്ലീഷ് പ്രീമിയര്‍ ലീഗില്‍ മാഞ്ചസ്റ്റര്‍ യുണൈറ്റ‍ഡിനും ആഴ്സണലിനും ലിവര്‍പൂളിനും ജയം
ഇംഗ്ലീഷ് പ്രീമിയര്‍ ലീഗില്‍ മാഞ്ചസ്റ്റര്‍ യുണൈറ്റഡിന് തകര്‍പ്പന്‍ ജയം. നിലവിലെ ജേതാക്കളായ ലെസ്റ്റര്‍ സിറ്റിയെ ഒന്നിനെതിരെ നാല് ഗോളിനാണ് മാഞ്ചസ്റ്റര്‍ യുണൈറ്റഡ് തോല്‍പ്പിച്ചത്. മറ്റ് മല്‍സരങ്ങളില്‍ ഹള്‍സിറ്റിയെ ലിവര്‍പൂളും ചെല്‍സിയെ ആഴ്സണലും പരാജയപ്പെടുത്തി. സ്പാനിഷ് ലീഗില്‍ സ്പോട്ടിങ് ഗിയോണിനെ ബാഴ്സലോണ പരാജയപ്പെടുത്തിയപ്പോള്‍ റയല്‍ മാഡ്രിഡിനെ ലാസ് പാല്‍മസ് സമനിലയില്‍ തളച്ചു.
പരാജയങ്ങളുമായി സമ്മര്‍ദത്തിലായ മാഞ്ചസ്റ്റര്‍ യുണൈറ്റഡിന് ആശ്വാസമായി ലെസ്റ്റര്‍ സിറ്റിക്കെതിരായ ജയം. മധ്യനിരയും മുന്നേറ്റനിരയും കാണിച്ച ഒത്തിണക്കമാണ് മാഞ്ചസ്റ്ററിന് ജയമൊരുക്കിയത്. ക്രിസ് മോളിങ്, യുവാന്‍ മാറ്റ, മാര്‍കസ് റഷ്ഫോള്‍ഡ്, പോള്‍ പോഗ്ബ എന്നിവര്‍ യുണൈറ്റഡിനായി ഗോള്‍ നേടി. പ്രീമിയര്‍ ലീഗില്‍ മാഞ്ചസ്റ്റര്‍ സിറ്റി കുതിപ്പ് തുടരുകയാണ്. സ്വാന്‍സീ സിറ്റിയെ ഒന്നിനെതിരെ മൂന്ന് ഗോളിനാണ് മാഞ്ചസ്റ്റര്‍ സിറ്റി കീഴടക്കിയത്.
ഹള്‍സിറ്റിക്കെതിരെ ഒന്നിനെതിരെ 5 ഗോളിനായിരുന്നു ലിവര്‍പൂളിന്റെ ജയം. ആദം ലല്ലാന, ജെയിംസ് മില്‍നര്‍, സാദിയോ മാനെ, ഫിലിപ്പ് കുടിഞ്ഞോ എന്നിവര്‍ ലിവര്‍പൂളിനായി ലക്ഷ്യം കണ്ടു. ചെല്‍സിക്കെതിരെ ആഴ്സണലിന്റെ ജയം ഏകപക്ഷീയമായ മൂന്ന് ഗോളിനായിരുന്നു. അലക്സി സാഞ്ചസ്, തിയോ വാല്‍ക്കോട്ട്, മൊസ്യൂട്ട് ഓസില്‍ എന്നിവരാണ് ആഴ്സണലിനായി ഗോള്‍ നേടിയത്.
സ്പാനിഷ് ലീഗില്‍ സ്പോര്‍ട്ടിങ് ഗിയോണിനെ എതിരില്ലാത്ത 5 ഗോളിന് ബാഴ്സലോണ തകര്‍ത്തു. ബാഴ്സക്കായി നെയ്മര്‍ ഇരട്ടഗോള്‍ നേടി. മറ്റൊരു മല്‍സരത്തില്‍ റയല്‍ മാഡ്രിഡിനെ ലാസ് പാല്‍മസ് സമനിലയില്‍ കുരുക്കി.