1000ത്തിലധികം റഷ്യന്‍ സൈനികരെ വധിച്ചതായി യുക്രൈന്‍ സൈന്യം
എന്നാല്‍ മരിച്ചവരുടെയും പരിക്കേറ്റവരുടെയും കണക്കുകള്‍ റഷ്യന്‍ സൈന്യം പുറത്തുവിട്ടിട്ടില്ല
Update: 2022-02-26 06:33 GMT
യുദ്ധം കൊടുമ്പിരിക്കൊണ്ടിരിക്കുകയാണ്. യുക്രൈനെതിരെ കടുത്ത ആക്രമണം തന്നെ നടത്തിക്കൊണ്ടിരിക്കുകയാണ് റഷ്യന്‍ സൈന്യം. നിര്‍ഭയരായി യുക്രൈന്‍ സൈന്യവും യുദ്ധമുഖത്തുണ്ട്. കനത്ത പോരാട്ടത്തിനിടെ ആയിരത്തിലധികം റഷ്യന്‍ സൈനികരെ വധിച്ചതായി യുക്രേനിയന്‍ സൈന്യം ശനിയാഴ്ച അറിയിച്ചു. എന്നാല്‍ മരിച്ചവരുടെയും പരിക്കേറ്റവരുടെയും കണക്കുകള്‍ റഷ്യന്‍ സൈന്യം പുറത്തുവിട്ടിട്ടില്ല.
അതേസമയം, റഷ്യൻ അധിനിവേശത്തിൽ 25 സാധാരണക്കാർ കൊല്ലപ്പെടുകയും 102 പേർക്ക് പരിക്കേൽക്കുകയും ചെയ്തതായി ഐക്യരാഷ്ട്രസഭ അറിയിച്ചു. കുറഞ്ഞത് 80 ടാങ്കുകൾ, 516 കവചിത യുദ്ധ വാഹനങ്ങൾ, ഏഴ് ഹെലികോപ്റ്ററുകൾ, 10 വിമാനങ്ങൾ, 20 ക്രൂയിസ് മിസൈലുകൾ എന്നിവ നശിപ്പിച്ചതായി യുക്രൈന്‍ അവകാശപ്പെട്ടു, അതേസമയം യുക്രൈനിലെ 211 സൈനിക അടിസ്ഥാന സൗകര്യങ്ങൾ തങ്ങളുടെ സൈനികർ തകർത്തതായി റഷ്യൻ പ്രതിരോധ മന്ത്രാലയം അറിയിച്ചു.
കിയവിലെ പ്രധാന അവന്യൂവിൽ സ്ഥിതി ചെയ്യുന്ന സൈനിക താവളത്തിൽ റഷ്യൻ സൈന്യം ആക്രമണം നടത്തിയെങ്കിലും പ്രതിരോധിച്ചതായി യുക്രേനിയൻ സൈന്യം പറഞ്ഞു. അതേസമയം വിക്ടറി അവന്യൂവിലെ സൈനിക യൂണിറ്റുകളിലൊന്ന് റഷ്യയുടെ ആക്രമണത്തിനിരയായി. യുക്രേനിയൻ തലസ്ഥാനത്തിന്‍റെ പ്രാന്തപ്രദേശത്ത് റഷ്യൻ, യുക്രേനിയൻ സേനകൾ തമ്മില്‍ ഏറ്റുമുട്ടിയിരുന്നു. അവസാന മിനിറ്റുകളിൽ ഡസൻ കണക്കിന് സ്ഫോടനങ്ങൾ നടന്നതായി ശനിയാഴ്ച പുലർച്ചെ പുറത്തുവന്ന റിപ്പോര്‍ട്ടുകള്‍ പറയുന്നു.
അതേസമയം യുക്രൈനും റഷ്യയും തമ്മിലുള്ള ചർച്ചകൾക്കുള്ള സ്ഥലത്തെയും സമയത്തെയും കുറിച്ചുള്ള ചർച്ചകള്‍ നടക്കുകയാണെന്ന് യുക്രേനിയൻ പ്രസിഡന്‍റ് വ്ളാദിമിര്‍ സെലൻസ്‌കിയുടെ വക്താവ് അറിയിച്ചു. റഷ്യ-യുക്രൈന്‍ സംഘര്‍ഷം മൂലം അഞ്ച് ദശലക്ഷം ആളുകള്‍ രാജ്യത്തു നിന്നും പലായനം ചെയ്തേക്കാമെന്ന് യു.എന്‍ ഏജന്‍സികള്‍ പറയുന്നു. രാജ്യത്ത് ഇന്ധനം, പണം, മരുന്നുകള്‍ എന്നിവയുടെ ലഭ്യത കുറഞ്ഞുവരികയാണെന്ന് റിപ്പോര്‍ട്ടുകള്‍ സൂചിപ്പിക്കുന്നു.