വ്യോമാക്രമണം ഇരട്ടിയാകും; കരയുദ്ധം ഉചിത സമയത്തെന്ന് ഇസ്രായേൽ

കുവൈത്ത് സിറ്റി: വ്യോമാക്രമണം കൂടുതൽ കടുപ്പിക്കാൻ ഇസ്രായേൽ സൈന്യം തീരുമാനിച്ചതോടെ കൊല്ലപ്പെടുന്നവരുടെ എണ്ണം വർധിച്ചു. ഇന്നലെ മാത്രം 250ന്​ മുകളിലാണ്​ മരണം. അടിയന്തര വെടിനിർത്തലും ഗസ്സയിലേക്ക്​ ഇന്ധനം കൈമാറണ​മെന്ന നിർദേശവും ഇസ്രായേൽ തള്ളി. ലബനാൻ, ഇസ്രായേൽ അതിർത്തിയിലും സംഘർഷം മൂർഛിച്ചു

വ്യോമാക്രമണം ഇരട്ടിയായി വർധിപ്പിക്കാനാണ്​ തീരുമാനമെന്ന്​ ഇസ്രായേൽ സൈനിക വക്​താവ്​ വെളിപ്പെടുത്തി. കരയുദ്ധം ആരംഭിക്കാൻ അനുയോജ്യ സമയം കാത്തിരിക്കുകയാണെന്നും ഹമാസിന്റെ​ പ്രതിരോധം മറികടന്ന്​ വിജയം നേടുമെന്നും അദ്ദേഹം പറഞ്ഞു. വ്യാപക ആക്രമണവും ഉപരോധവും ഗസ്സയിലെ മാനുഷിക പ്രതിസന്ധിക്ക്​ ആക്കം കൂട്ടുകയാണ്​. ഇന്നലെ റഫ അതിർത്തി മുഖേന 20 ട്രക്കുകൾ എത്തിയെങ്കിലും ഉൽപന്നങ്ങൾ ഒട്ടും പര്യാപ്​ത​മല്ലെന്ന്​ ലോകാരോഗ്യ സംഘടനയും യൂനിസെഫും അറിയിച്ചു.

ഇന്ധനം തീർന്നത്​ ആശുപത്രികളുടെ പ്രവർത്തനത്തെയും ബാധിച്ചു. ഇൻകുബേറ്ററിലുള്ള 130 കുട്ടികൾ മരണം കാത്തുകഴിയുന്നതായി ഫലസ്​തീൻ ആരോഗ്യ മന്ത്രാലയം വ്യക്തമാക്കി. എന്നാൽ ഗസ്സയിലേക്ക്​ ഇന്ധനം നൽകില്ലെന്ന നിലപാടിൽ മാറ്റമില്ലെന്ന്​​ ഇസ്രായേൽ വ്യക്തമാക്കുന്നു. 

തുർക്കി, ഖത്തർ ഉൾപ്പെടെ നിരവധി രാജ്യങ്ങൾ നയതന്ത്ര നീക്കം ഊർജിതമാക്കിയെങ്കിലും ഇസ്രായേലും അമേരിക്കയും വഴങ്ങുന്ന ലക്ഷണമില്ല. ഖത്തർ നേതാക്കളുമായി യു.എസ്​ സ്​റ്റേറ്റ്​ സെക്രട്ടറി ഫോണിൽ സംസാരിച്ചു. തുർക്കി പ്രസിഡന്റ്​ ഉർദുഗാൻ, ഹമാസ്​ രാഷ്​ട്രീയകാര്യ മേധാവി ഇസ്​മാഈൽ ഹനിയ്യയുമായും ചർച്ച നടത്തി. മാനുഷിക പരിഗണന മുൻനിർത്തി ബന്ദികളിൽ രണ്ട്​ വനിതകളെ കൂടി നിരുപാധികം വിട്ടയക്കാൻ സന്നദ്ധത അറിയിച്ചെങ്കിലും അവരെ ഏറ്റെടുക്കാൻ ഇസ്രായേൽ വിമുഖത കാണിച്ചതായി ഹമാസ്​ വക്​താവ്​ കുറ്റപ്പെടുത്തി.

ബന്ദികളായ എല്ലാവരെയും സുരക്ഷിതമായി എത്തിക്കുമെന്ന് പറയാനാകില്ലെന്നും എന്നാൽ ഹമാസിന്റെ തോൽവി ഉറപ്പാണെന്നും ഇസ്രായേൽ സൈനിക വക്താവ് വ്യക്തമാക്കി. യുക്രയിൻ, ഇസ്രായേൽ ജയം അമേരിക്കൻ സുരക്ഷക്ക്​ അതിപ്രധാനമെന്ന്​ പ്രസിഡന്റ്​ ബൈഡൻ പറഞ്ഞു. ലബനാനിൽ യുദ്ധമുഖം തുറക്കുന്നതിൽ ആശങ്കയുണ്ടെന്ന്​ അമേരിക്കൻ സ്​റ്റേറ്റ്​ സെക്രട്ടറി ആന്റണി ബ്ലിൻകൻ ലബനാൻ പ്രധാനമന്ത്രിയെ ഫോണിൽ അറിയിച്ചു.