യു.എൻ റിപ്പോർട്ടിനെതിരെ ഇസ്രായേൽ; ഏകപക്ഷീയമെന്ന്​ അമേരിക്ക

വാഷിംഗ്ടൺ: യു.എൻ മനുഷ്യാവകാശ സമിതി റിപ്പോർട്ടിനെതിരെ ഇസ്രായേലും അമേരിക്കയും. ഫലസ്​തീൻ പ്രദേശങ്ങളിൽ പുതുതായി അധിനിവേശം സ്​ഥാപിക്കാനുള്ള ഇസ്രായേൽ നടപടിയെ വിമർശിച്ചതാണ്​ ഇരു രാജ്യങ്ങളെയും ചൊടിപ്പിച്ചത്​. യു.എൻ അന്വേഷണവുമായി ഒരുനിലക്കും സഹകരിക്കില്ലെന്നായിരുന്നു തുടക്കം മുതൽ​ ഇസ്രായേൽ നിലപാട്​.

ഭാവിയിൽ സ്വതന്ത്ര ഫലസ്​തീൻ രാഷ്​ട്രത്തിന്റെ ഭാഗമായി കാണുന്ന പ്രദേശങ്ങളിലേക്ക്​ അധിനിവേശം വ്യാപിപ്പിക്കാൻ ഇസ്രായേൽ ആസൂത്രിത നീക്കം നടത്തുന്നതായാണ്​ 28 പേജുള്ള റിപ്പോർട്ടിലൂടെ യു.എൻ മനുഷ്യാവകാശ സമിതി ലോകത്തെ അറിയിച്ചത്​. യു.എൻ പൊതുസഭക്ക്​ സമർപ്പിച്ച റിപ്പോർട്ട്​ ചർച്ചക്കെടുക്കാനിരിക്കെയാണ്​ അമേരിക്കയെ കൂട്ടുപിടിച്ചുള്ള ഇസ്രായേൽ പ്രതിരോധം. യു.എൻ റിപ്പോർട്ട്​ തികച്ചും ഏകപക്ഷീയമാണെന്ന്​​ അമേരിക്ക കുറ്റപ്പെടുത്തി.

യു.എൻ മനുഷ്യാവകാശ സമിതിയുടെ അന്വേഷണത്തെ തുടക്കം മുതൽ എതിർത്തു വരികയാണ്​ ഇസ്രായേലും അമേരിക്കയും. വെസ്​റ്റ്​ബാങ്കിലും മറ്റും അന്യായ കുടിയേറ്റത്തിനുള്ള ഇസ്രായേൽ പദ്ധതി അവസാനിപ്പിച്ചില്ലെങ്കിൽ സ്​ഥിതിഗതികൾ ഗുരുതരമാകുമെന്നും റിപ്പോർട്ടിലുണ്ട്​.

അന്താരാഷ്​ട്ര ചട്ടങ്ങളുടെ പരസ്യമായ ലംഘനമാണിതെന്ന യു.എൻ സമിതിയുടെ കണ്ടെത്തൽ ശരിയല്ലെന്ന്​ അമേരിക്ക പ്രതികരിച്ചു. അതേ സമയം റിപ്പോർട്ടിൽ യൂറോപ്യൻ യൂനിയൻ രാജ്യങ്ങൾ എന്തു നിലപാട്​ സ്വീകരിക്കും എന്നത്​ പ്രധാനമാണ്​. യു.എൻ പൊതുസഭയിൽ വിഷയം ചർച്ചക്കെടുക്കുമ്പോൾ പരമാവധി രാജ്യങ്ങളുടെ പിന്തുണ ഉറപ്പാക്കാനുള്ള നീക്കത്തിലാണ്​ അറബ്​ ലീഗ്​ ഉൾപ്പെടെയുള്ള കൂട്ടായ്​മകൾ.