ഗസ്സ പിടിച്ചെടുക്കാൻ വൻസന്നാഹവുമായി ഇസ്രായേൽ;ആശുപത്രികളിലും സ്കൂളുകളിലും ആക്രമണം, മരണസംഖ്യ 1400 കവിഞ്ഞു

ഗസ്സ: സമ്പൂർണ ഉപരോധത്തിലായ ഗസ്സക്കു നേരെ കരയുദ്ധത്തിനുള്ള സന്നാഹങ്ങൾ ശക്​തമാക്കി ഇസ്രായേൽ. ഗസ്സയുടെ നിരവധി കേന്ദ്രങ്ങളിൽ നൂറുകണക്കിന്​ ആക്രമണങ്ങൾ രാത്രിയും തുടർന്നു. ഇരുഭാഗത്തുമായി ആൾനാശം 1400 കവിഞ്ഞു. അയ്യായിരത്തിനും മുകളിലാണ്​ പരിക്കേറ്റവരുടെ എണ്ണം.

ചരിത്രത്തിൽ തുല്യതയില്ലാത്ത ഇസ്രയേൽ വ്യോമാക്രമണത്തിനാണ്​ ഗസ്സ സാക്ഷിയാകുന്നത്​. ആശുപത്രികൾ, സ്​കൂളുകൾ, ആംബുലൻസ്​ കേന്ദ്രങ്ങൾ, സിവിലിയൻ താമസ കേന്ദ്രങ്ങൾ എന്നിവയെ ലക്ഷ്യം വെച്ചായിരുന്നു ആക്രമണങ്ങളിൽ അധികവും. മൂന്നു ലക്ഷം റിസർവ്​ സൈനികരെയാണ്​ ഗസ്സ പിടിക്കാൻ ഇസ്രയേൽ സജ്​ജമാക്കുന്നത്​. ഇസ്രയേലിനുള്ളിലെത്തിയ ഹമാസ് പോരാളികളെ അമർച്ച ചെയ്യാനുള്ള നീക്കവും സൈന്യം തുടരുകയാണ്​. ഇസ്രയേൽ ആക്രമണത്തിന്​ തടവിലുള്ള ഓ​രോ ഇസ്രയേലികളെയും കൊന്ന്​ തിരിച്ചടിക്കുമെന്ന്​ ഹമാസ്​ താക്കീത്​ ചെയ്​തു. ദക്ഷിണ ലബനാനു നേരെ ഇസ്രയേൽ നടത്തിയ ഷെല്ലാക്രമണത്തിൽ​ മൂന്ന്​ ഹിസ്​ബുല്ല പോരാളികൾ കൊല്ലപ്പെട്ടു. രണ്ട്​ ഇസ്രയേൽ സൈനിക കേന്ദ്രങ്ങൾക്കു നേരെ മിസൈൽ ആക്രമണം നടത്തി ഹിസ്​ബുല്ല തിരിച്ചടിച്ചു.

ഏതൊരു നടപടിക്കും സജ്​ജമായിരിക്കാൻ ഹിസ്​ബുല്ല തങ്ങളുടെ പോരാളികൾക്ക്​ നിർദേശം നൽകി. ഇസ്രായേലിനു നേർക്കുള്ള ഹമാസ്​ റോക്കറ്റ് വര്‍ഷം ഇന്ന്​ വെളുപ്പിനും തുടർന്നു. 86 സൈനികർ ഉൾപ്പെടെ ഹമാസ്​ ആക്രമണത്തിൽ കൊല്ലപ്പെട്ട ഇസ്രായേലികളുടെ എണ്ണം 900 ആയി. ഗസ്സയിലും മരണസംഖ്യ കുത്തനെ ഉയർന്നു. 600ൽ ഏറെ പേർ മരിച്ചതായി ഫലസ്​തീൻ ആരോഗ്യ മന്ത്രാലയം അറിയിച്ചു. തലമുറകൾ ഓർക്കുന്ന കനത്ത പ്രഹരമാകും ശത്രുവിന്​ നൽകുകയെന്ന്​ ഇസ്രയേൽ പ്രധാനമ​ന്ത്രി നെതന്യാഹു മുന്നറിയിപ്പ്​ നൽകി.

ദീർഘകാല യുദ്ധത്തിന്​ തങ്ങളും സജ്​ജമാണെന്ന്​ ഹമാസ്​ സൈനിക വിഭാഗം പറഞ്ഞു. ആക്രമണം തുടരു​​മ്പോൾ ബന്ദികളാക്കപ്പെട്ടവരുടെ കാര്യത്തിൽ ചർച്ചക്കില്ലെന്നും ഹമാസ്​ വ്യക്​തമാക്കി. പ്രകോപനപരമായ പ്രസ്​താവനയുടെ പേരിൽ ഇസ്രയേൽ പ്രതിരോധ മന്ത്രിക്കെതിരെ യുദ്ധകുറ്റ പ്രേരണക്ക്​ നടപടിയെടുക്കണമെന്ന്​ അന്താരാഷ്​ട്ര ക്രിമിനൽ കോടതിയോട്​ ഹ്യൂമൻ റൈറ്റ്​സ്​ വാച്ച്​ ആവശ്യപ്പെട്ടു.