ഗസ്സയിൽ ഇസ്രായേൽ കൂട്ടക്കുരുതി തുടരുന്നു; ബന്ദികളിൽ ഒരു വിഭാഗത്തെ വിട്ടയച്ച് വെടിനിർത്തലിന് തിരക്കിട്ട നീക്കം

തെല്‍ അവിവ്: മാനുഷിക ദുരന്തത്തി​ന്‍റെ വക്കിലെത്തിയ ഗസ്സക്കു നേരെ ഇസ്രായേൽ ആക്രമണം വീണ്ടും ശക്​തമായിരിക്കെ, ബന്ദികളിൽ ഒരു വിഭാഗത്തെ വിട്ടയച്ച്​ വെടിനിർത്തലിന്​ അവസരം സൃഷ്​ടിക്കാൻ തിരക്കിട്ട നീക്കം. ഖത്തർ മധ്യസ്​ഥതയിൽ ഒരുപറ്റം ബന്ദികളെ വരെ കൈമാറാൻ ഹമാസ്​ സന്നദ്ധത അറിയിച്ചതായി റിപ്പോർട്ടുണ്ട്​. അമേരിക്കൻ ഇന്‍റലിജന്‍സ് ഏജൻസി ഡയറക്​ടർ ഇന്ന്​ ഖത്തറിലെത്തും. അറബ്​, മുസ്​‍ലിം രാജ്യങ്ങളുടെ നിർണായക നേതൃയോഗങ്ങൾക്ക്​ സൗദി വേദിയാകും. യുദ്ധാനന്തര ഗസ്സയുടെ ഭാവി നിർണയിക്കുന്ന ചർച്ചകളിൽ തങ്ങളുണ്ടാകില്ലെന്ന്​ ജോർദാൻ അറിയിച്ചു.

വെള്ളവും ഭക്ഷണവും മരുന്നും ഇന്ധനവും നിഷേധിച്ച്​ എല്ലാ അർഥത്തിലും ഗസ്സയെ യഥാർഥ ശവപ്പറമ്പാക്കി മാറ്റുകയാണ്​ ഇസ്രായേൽ. ഗസ്സയിൽ കൂടുതൽ ഉള്ളോട്ട്​ കയറിയ കരസൈന്യം നിരവധി കൂട്ടക്കുരുതികളിലൂടെ നൂറുകണക്കിന്​ ഫലസ്​തീനികളെ ഇന്നലെ രാത്രിയും കൊന്നൊടുക്കി. താമസ കേന്ദ്രങ്ങളും ആശുപത്രികളും പള്ളികളും തെരഞ്ഞു പിടിച്ചാണ്​ ആക്രമണം. സൈന്യത്ത​ിനെതിരെ ധീരമായ പോരാട്ടം തുടരുകയാണെന്ന്​ ഹമാസ്​ സൈനിക വിഭാഗം. നൂറുകണക്കിന്​ ഇസ്രായേൽ ​സൈനിക വാഹനങ്ങൾ തകർത്തതായും ഹമാസ്​. വടക്കൻ ഗസ്സയിലെ രണ്ട്​ വസതികളിൽ നടന്ന ബോംബിങ്ങിൽ മാത്രം 30 പേർ​ കൊല്ലപ്പെട്ടു.

ഇന്നലെ വരെ ഗസ്സയിൽ കൊല്ലപ്പെട്ടവരുടെ എണ്ണം 10.569 ആണ്​ ഇവരിൽ 4324 പേരും കുട്ടികൾ. ഇന്ധനം തീർന്നതോടെ ഗസ്സയിലെ അൽ ഔദ ആശുപത്രിയുടെ പ്രവർത്തനവും ഏറെക്കുറെ നിലച്ചു. ഗസ്സയിലേക്ക്​ കൂടുതൽ സഹായം എത്തിക്കാനും ഇന്​ധനം ഉറപ്പാക്കാനുമുള്ള നീക്കങ്ങൾ ഇസ്രായേൽ വിലക്ക് കാരണം മുന്നോട്ടു പോയില്ല. അഭയാർഥികളായവർക്കു നേരെയും നിരന്തര ആക്രമണം തുടർന്നു. ലബനനിൽ നിന്നുള്ള ആക്രമണം രൂക്ഷമായതോ​ടെ ശക്​തമായി തിരച്ചടിച്ചതായി ഇസ്രായേൽ സൈന്യം. ഹിസ്​ബുല്ലയുടെ സൈനിക സംവിധാനം തകർത്തതായും ഇസ്രായേൽ. അമേരിക്കൻ ചാരവിമാനം വെടിവെച്ചിട്ടതായി യെമനിലെ ഹൂത്തികൾ.

ഗസ്സയിൽ തുടരുന്ന ക്രൂരതകൾ ഇസ്രായേല​ിനോടുള്ള ലോകത്തി​ന്‍റെ അനുഭാവം നഷ്​ടപ്പെടുത്തിയെന്ന്​ യു.എൻ സെക്രട്ടറി ജനറൽ അന്‍റോണിയോ ഗുട്ടറസ്​. ഗസ്സയിൽ ഇസ്രായേലി​ന്‍റെ സൈനിക ഓപറേഷനിൽ ഗുരുതര തെറ്റ്​ സംഭവിച്ചതി​ന്‍റെ തെളിവാണ്​ കൂട്ടക്കുരുതിയെന്നും ഗുട്ടറസ്​. യുദ്ധാനന്തര ഗസ്സയുടെ ഭാവിസുരക്ഷ തങ്ങൾക്ക്​ തന്നെയാകുമെന്ന ഇസ്രായേൽ വാദം തള്ളി അമേരിക്ക. ഗസ്സയുടെ ഭാവി തീരുമാന​ിക്കേണ്ടത്​ ഫലസ്​തീൻ ജനത തന്നെയാണെന്നും യു.എസ്​ നേതൃത്വം. ഗസ്സയുടെ ഭാവിയെ കുറിച്ച നിർദേശങ്ങൾ തീർത്തും അസ്വീകാര്യമാണെന്ന്​ ജോർദാൻ വിദേശകാര്യ മന്ത്രി അറബ്​ ലീഗ്​ മന്ത്രിതല യോഗം ഇന്ന്​ സൗദിയിൽ ചേരും. ഇറാൻ പ്രസിഡൻറ്​ ഉൾപ്പെടെയുള്ളവർ പ​ങ്കെടുക്കുന്ന ഒ.ഐ.സി അടിയന്തര യോഗം ശനിയാഴ്​ച നടക്കും.