ഫലസ്​തീൻ കുട്ടികളെ വെടിവെച്ചു കൊന്ന്​ ഇസ്രായേൽ സൈന്യം; വെസ്​റ്റ്​ ബാങ്കിൽ മരണനിരക്ക്​ മൂന്നിരട്ടിയായി

ജെറുസലേം: അധിനിവേശ വെസ്​റ്റ്​ ബാങ്കിൽ ഇസ്രായേൽ സൈന്യം ഫലസ്​തീൻ കുട്ടികളെ കൊല്ലുന്നത്​ മൂന്നിരട്ടിയായി വർധിച്ചെന്ന്​ ഐക്യരാഷ്​ട്ര സഭ. വെസ്​റ്റ്​ ബാങ്കിലെ വിനാശകരമായ അവസ്​ഥയുടെ ദുരിതം അനുഭവിക്കുന്നത്​ കുട്ടികളാണെന്ന്​ യുഎൻ വക്​താവ്​ സ്​റ്റീഫൻ ദുജാറിക്​ വാർത്താസമ്മേളനത്തിൽ പറഞ്ഞു.

2023 ഒക്​ടോബർ ഏഴിന്​ ശേഷം വെസ്​റ്റ്​ ബാങ്കിൽ ഓരോ ആഴ്​ചയും ശരാശരി നാല്​ ഫലസ്​തീൻ കുട്ടികളാണ്​ കൊല്ലപ്പെടുന്നത്​. 2023ലെ ആദ്യത്തെ ഒമ്പത്​ മാസത്തെ അപേക്ഷിച്ച്​ നോക്കു​േമ്പാൾ മൂന്നിരട്ടിയാണ്​ വർധനവ്​. അനധികൃത ഇസ്രായേലി കുടിയേറ്റക്കാരുടെ അക്രമവും അധിനിവേശ വെസ്​റ്റ്​ബാങ്കിൽ വർധിച്ചിട്ടുണ്ട്​. ഇതുകാരണം നിരവധി കുട്ടികളാണ്​ വഴിയാധാരമായത്​.

കുടിയേറ്റക്കാരുടെ അക്രമം, ഭീഷണിപ്പെടുത്തൽ, ഉപദ്രവം എന്നിവ കാരണം ബദൂവിയൻ, പശുവളർത്തൽ വിഭാഗങ്ങളിൽ 1700ഓളം പേരാണ്​ കുടിയിറക്കപ്പെട്ടത്. ഇതിൽ പകുതിയോളം കുട്ടികളാണെന്നും സ്​റ്റീഫൻ ദുജാറിക്​ വ്യക്​തമാക്കി.

കഴിഞ്ഞ കുറച്ചുവർഷങ്ങളായി അധിനിവേശ വെസ്​റ്റ്​ ബാങ്കിൽ ഇസ്രായേൽ സൈന്യം നിരന്തരം റെയ്​ഡുകൾ നടത്തുന്നുണ്ട്​. ഒക്​ടോബർ ഏഴിന്​ ശേഷം ഇതിൽ വലിയ രീതിയിലുള്ള വർധനവാണ്​ ഉണ്ടായിട്ടുള്ളത്​. ഇത്​ കൂടാതെ അനധികൃത ഇസ്രായേലി കുടി​യേറ്റക്കാരും നിരന്തരം ആക്രമണം അഴിച്ചുവിടുന്നുണ്ട്​. തീവ്ര വലതുപക്ഷ മന്ത്രി ഇറ്റാമർ ബെൻഗവിറിനെ പോലുള്ളവരും ഇവർക്ക്​ പൂർണ പിന്തുണ നൽകുകയാണ്​.

വെസ്​റ്റ്​ ബാങ്കിൽ ഇസ്രായേൽ സൈന്യത്തി​െൻറ വെടിയേറ്റ്​ 795 പേർ കൊല്ലപ്പെട്ടുവെന്നാണ്​ ഫലസ്​തീൻ ആരോഗ്യ മന്ത്രാലയത്തി​െൻറ കണക്ക്​. 6450 പേർക്ക്​ പരിക്കേൽക്കുകയും ചെയ്​തു. കൂടാതെ നിരവധി പേരെയാണ്​ ദിവസവും പിടികൂടി ജയിലിലടക്കുന്നത്​.

കഴിഞ്ഞ ജൂലൈയിൽ ഫലസ്​തീൻ മണ്ണിലുള്ള ഇസ്രായേലി​െൻറ അധിനിവേശം നിയമവിരുദ്ധമാണെന്ന്​ അന്താരാഷ്​ട്ര നീതിന്യായ കോടതി വ്യക്​തമാക്കിയിരുന്നു. വെസ്​റ്റ്​ ബാങ്കിലെയും കിഴക്കൻ ജെറുസലേമിലെയും എല്ലാ കുടിയേറ്റങ്ങളും ഒഴിയണമെന്നും ആവശ്യപ്പെടുകയുണ്ടായി. എന്നാൽ, ഇതിനുശേഷവും അനധികൃത ഇസ്രായ്രലി കുടിയേറ്റം നിർബാധം തുടരുകയാണ്​.