ഒടുക്കം കണ്ടെത്തി, ലോകത്ത് വടക്കേ അറ്റത്തെ ഇത്തിരിക്കുഞ്ഞന്‍ ദ്വീപ്

കടൽ നിരപ്പിൽനിന്ന്​ പരമാവധി മൂന്നു മീറ്റർ വരെ ഉയരം, 30 മീറ്റർ വീതി, മഞ്ഞുപാളികള്‍ നീങ്ങി കല്ലും മണ്ണും ചേർന്ന ഉപരിതലം.. മഞ്ഞുരുക്കം അതിവേഗത്തിലായ​ ഗ്രീൻലൻഡ്​ പരിസരങ്ങളില്‍ പുതുതായൊരു ദ്വീപ്​ മനുഷ്യദൃഷ്ടിയില്‍ പതിഞ്ഞിരിക്കുകയാണ്. ലോകത്തെ ഏറ്റവും ഉത്തരദേശ​ത്തു സ്​ഥിതി ചെയ്യുന്ന ഈ ഇത്തിരിക്കുഞ്ഞന്‍ ദ്വീപ്​ കണ്ടെത്തിയ ആവേശത്തിലാണ് ശാസ്ത്രജ്ഞര്‍. 

1978ൽ ഡാനിഷ്​ സംഘം കണ്ടെത്തിയ ഊദാഖ്​ ദ്വീപിലെത്തിയെന്നായിരുന്നു പര്യവേക്ഷണ സംഘം ആദ്യം കരുതിയിരുന്നതെങ്കിലും പിന്നീട്​ നടത്തിയ പരിശോധനയില്‍​ ഇതിൽ നിന്ന്​ 780 മീറ്റർ മാറി സ്​ഥിതി ചെയ്യുന്ന പുതിയ ദ്വീപാണെന്ന്​ തെളിഞ്ഞു​. 'ഏറ്റവും ഉത്തരദേശത്തെ ദ്വീപ്​' എന്നർഥമുള്ള 'ക്വകർടാഖ്​ അവനർലെഖ്​' എന്ന് ദ്വീപിന്​ പേരിടാൻ ശിപാർശ ചെയ്യുമെന്നും അന്വേഷണ സംഘം പറയുന്നു. 

ലോകത്തിന്‍റെ വടക്കേ അറ്റത്തെ ദ്വീപ് കണ്ടെത്താന്‍ അടുത്തിടെ നിരവധി സംഘങ്ങള്‍ ശ്രമം നടത്തിയിരുന്നു. 2007ൽ ആർടിക്​ ​പര്യ​വേക്ഷകന്‍ ഡെന്നിസ്​ ഷ്​മിഡ്​റ്റ് സമീപത്തായി ഒരു ദ്വീപ് കണ്ടെത്തുകയും ചെയ്തിരുന്നു. ആർടിക്​ കടലിലെ അവകാശങ്ങളെ ചൊല്ലി അമേരിക്ക, റഷ്യ, ഡെൻമാർക്​, കാനഡ, നോർവേ തുടങ്ങിയ രാഷ്​ട്രങ്ങൾ തമ്മിൽ ആശയക്കുഴപ്പം നിലനിൽക്കെയാണ്​ പുതിയ കണ്ടെത്തല്‍. 

അതേസമയം, ഗ്രീൻലൻഡിലെ മഞ്ഞുപാളികൾ അതിവേഗം ഉരുകുന്നത്​ ആഗോള താപനം സംബന്ധിച്ച ആശങ്കകള്‍ ഇരട്ടിയാക്കുന്നുണ്ട്. ഏറ്റവും കട്ടിയേറിയ ധ്രുവമഞ്ഞുള്ള പ്രദേശങ്ങളാണിത്​. നാലു മീറ്റർ വരെ കട്ടിയിലായിരുന്നത്​ അടുത്തിടെ രണ്ടു മുതല്‍ മൂന്നു മീറ്ററായി ചുരുങ്ങിയിട്ടുണ്ട്.