ബാങ്കോക്ക്-കൊൽക്കത്ത വിമാനത്തിൽ ഇന്ത്യക്കാർ തമ്മിൽ വാക്കേറ്റം, കയ്യാങ്കളി; ദൃശ്യങ്ങൾ പുറത്ത്

ബാങ്കോക്ക്-കൊൽക്കത്ത വിമാനത്തിൽ ഇന്ത്യക്കാരായ യാത്രക്കാർ തമ്മിൽ വാക്കേറ്റവും കയ്യാങ്കളിയും. ബാങ്കോക്കിൽനിന്ന് കൊൽക്കത്തിയിലേക്ക് പുറപ്പെട്ട തായ് സ്‌മൈൽ എയർവേ വിമാനത്തിലാണ് യാത്രക്കാർ സംഘർഷത്തിലേർപ്പെട്ടത്. തർക്കത്തിനിടയായ സാഹചര്യം വ്യക്തമല്ല. ഇതിന്റെ ദൃശ്യങ്ങൾ സമൂഹമാധ്യമങ്ങളിൽ വൈറലാണ്.

ആദ്യം വാക്കുതർക്കത്തിലാണ് തുടങ്ങിയതെങ്കിലും പിന്നീട് ഇരുവരും കയ്യാങ്കളിയിൽ ഏർപ്പെടുകയായിരുന്നു. ഇവരിൽ ഒരാളുടെ സുഹൃത്തും സംഘർഷത്തിന്റെ ഭാഗമായി. മറ്റ് യാത്രക്കാരും എയർഹോസ്റ്റസുമാരും ഇവരെ തടയാൻ ശ്രമിച്ചെങ്കിലും കാര്യമുണ്ടായില്ല. സംഭവത്തിൽ അന്വേഷണം ആരംഭിച്ചതായി അധികൃതർ വ്യക്തമാക്കി. മറ്റു യാത്രക്കാരുടെ സുരക്ഷയെ അപകടത്തിലാക്കും വിധം സംഘർഷത്തിലേർപ്പെട്ട ഇവരെ നോ ഫ്‌ലൈ ലിസ്റ്റിൽ പെടുത്തണമെന്ന ആവശ്യവും ഇതിനോടകം ഉയർന്നിട്ടുണ്ട്.