'ഹിസ്ബുല്ലയ്‍ക്കെതിരെ തുറന്ന യുദ്ധം വേണ്ട'; ഇസ്രായേലിനെ പിന്തിരിപ്പിക്കാൻ അമേരിക്കയുടെ തീവ്രശ്രമം

തെല്‍അവീവ്: ലബനാനിൽ ഹിസ്ബുല്ലയ്ക്കുനേരെയുള്ള തുറന്ന യുദ്ധത്തിൽനിന്ന്​ ഇസ്രായേലിനെ പിന്തിരിപ്പിക്കാൻ അമേരിക്കയുടെ തീവ്രശ്രമം. എന്നാല്‍, ലബനാനുനേരെയുള്ള സൈനിക നടപടിയിലുറച്ചുനില്‍ക്കുകയാണ്​ ഇസ്രായേൽ. ദീർഘകാല യുദ്ധത്തിന്​ സജ്ജമാണെന്നാണ്​ ഹമാസ്​ തലവന്‍​ യഹ്‍യ സിൻവാർ അറിയിച്ചത്.

ലബനാനുനേരെ തുറന്ന യുദ്ധത്തിൽനിന്ന്​ ഇസ്രായേലിനെ പിന്തിരിപ്പിക്കാൻ തിരക്കിട്ട നീക്കം തുടരുന്നതായാണ് അമേരിക്ക സൂചിപ്പിക്കുന്നത്. ഇന്നലെ തെൽഅവീവിൽ ഇസ്രായേൽ നേതാക്കളുമായി യു.എസ്​ പ്രസിഡന്‍റ്​ ജോ ബൈഡന്‍റെ ഉപദേശകൻ അമോസ്​ ഓസ്റ്റിൻ ചർച്ച നടത്തി. ലബനാനെതിരായ വ്യാപകയുദ്ധം മേഖലായുദ്ധമായി മാറുമെന്നും തുടർപ്രത്യാഘാതം ഗുരുതരമായിരിക്കുമെന്നും ഓസ്റ്റിൻ ഇസ്രായേൽ നേതാക്കളെ അറിയിച്ചതായി മാധ്യമങ്ങൾ റിപ്പോർട്ട്​ ചെയ്തു.

എന്നാൽ, വടക്കൻ ഇസ്രായേലിൽനിന്ന്​ മാറ്റിപ്പാർപ്പിച്ച ആയിരങ്ങളുടെ തിരിച്ചുവരവിന്​ അവസരമൊരുക്കുകയാണ്​ പ്രധാനമെന്ന്​ നെതന്യാഹു പറഞ്ഞു. സൈനിക സമ്മർദത്തിലൂടെ മാത്രമേ ഹിസ്​ബുല്ലയെ അമർച്ച ചെയ്യാൻ കഴിയൂ എന്നായിരുന്നു പ്രതിരോധമന്ത്രി യോവ്​ ഗാലന്‍റിന്‍റെ പ്രതികരണം. കഴിഞ്ഞ ദിവസം ഹൂതികൾ അയച്ച മിസൈൽ തെൽഅവീവിൽ പതിച്ചതിന്‍റെ ആഘാതത്തിലാണ് ഇസ്രായേൽ. ശക്തമായി പകരം ചോദിക്കുമെന്ന്​ നെതന്യാഹു ആവർത്തിച്ചു.

ഹൂതികൾക്ക് സൂപ്പർ സോണിക്​ മിസൈലുകൾ​ കൈമാറിയെന്ന ആരോപണം ഇറാൻ പ്രസിഡന്‍റ്​ നിഷേധിച്ചു. എന്നാൽ, യമൻ ജനത ഫലസ്തീൻ സമൂഹത്തിന്​ നൽകുന്ന പിന്തുണയ്ക്ക്​ ഹമാസ്​ നേതാവ്​ യഹ്​യ സിൻവാർ നന്ദി അറിയിച്ചു. ഇസ്രായേലിനെതിരെ ദീർഘകാല യുദ്ധത്തിന്​ സജ്ജമാണെന്നും ഹൂതി നേതൃത്വത്തിന്​ കൈമാറിയ കത്തിൽ യഹ്​യ സിൻവാർ വ്യക്​തമാക്കി.

അതിനിടെ, ഇസ്രായേൽ സൈന്യം ഗസ്സയിലുടനീളം ആക്രമണം തുടരുകയാണ്​. നുസ്റത്ത് ക്യാമ്പിൽ കഴിഞ്ഞ 10 പേർ മരിച്ചു. ഗസ്സ സിറ്റിയിലെ സെയ്‌ടൗൺ, ഷെയ്ഖ് റദ്‌വാൻ എന്നീ നഗരങ്ങളിൽ നടത്തിയ ആക്രമണങ്ങളിൽ കുട്ടികളടക്കം 12 പേർ കൊല്ലപ്പെട്ടു. ഗസ്സയിൽ വെടിനിർത്തലിന്​ മധ്യസ്ഥ രാജ്യങ്ങൾക്ക് പുതിയ നിർദേശം​ സമർപ്പിച്ചതായും അതിൻമേൽ ആശയവിനിമയം തുടരുന്നതായും യു.എസ്​ സ്​റ്റേറ്റ്​ വകുപ്പ്​ പ്രതികരിച്ചു.

Summary: US desperate to dissuade Israel from open war against Hezbollah in Lebanon