പൃഥ്വിരാജിന് സുപ്രിയയുടെ 45.5 ലക്ഷത്തിന്റെ പിറന്നാള്‍ സമ്മാനം
ബ്രിട്ടീഷ് വാഹന നിര്‍മാതാക്കളായ മിനിയുടെ ഏറ്റവും കരുത്തന്‍ വാഹനമായ ജെസിഡബ്ല്യുവാണ് താരത്തിന് ഭാര്യ സമ്മാനമായി നല്‍കിയത്.
Update: 2021-09-30 16:58 GMT
പൃഥ്വിരാജിന് അപ്രതീക്ഷിത പിറന്നാള്‍ സമ്മാനം നല്‍കി ഭാര്യ സുപ്രിയ. ബ്രിട്ടീഷ് വാഹന നിര്‍മാതാക്കളായ മിനിയുടെ ഏറ്റവും കരുത്തന്‍ വാഹനമായ ജെസിഡബ്ല്യുവാണ് താരത്തിന് ഭാര്യ സമ്മാനമായി നല്‍കിയത്. ലംബോര്‍ഗിനി, റേഞ്ച് റോവര്‍, ബിഎംഡബ്യൂ 7 സീരിസ് തുടങ്ങിയ ആഡംബര കാറുകള്‍ നിരന്ന് കിടക്കുന്ന ഗാരേജിലേക്കാണ് പുതിയ മിനികൂപ്പറും എത്തുന്നത്. 45.50 ലക്ഷം രൂപയാണ് വാഹനത്തിന്റെ എക്‌സ് ഷോറൂം വില. സുപ്രിയ പൃഥ്വിക്ക് വാഹനത്തിന്റെ ചാവി കൈമാറുന്ന ചിത്രം സമൂഹ മാധ്യമങ്ങളില്‍ വൈറലാണ്
മിനി കൂപ്പറിന്റെ പെര്‍ഫോമന്‍സ് പതിപ്പാണ് ജോണ്‍ കൂപ്പര്‍ വര്‍ക്ക് എന്ന ജിസിഡബ്ല്യു. മിനിയുടെ ഇന്ത്യയിലെ ഏറ്റവും കരുത്തന്‍ കാറാണ് ഇത്. 2.0 പെട്രോള്‍ എന്‍ജിനാണ് ജെസിഡബ്ല്യു പതിപ്പിന് കരുത്തു നല്‍കുന്നത്. മിനികൂപ്പറിന്റെ മറ്റ് മോഡലുകളെ പോലെ സ്‌പോര്‍ട്ടി ഭാവം നല്‍കിയാണ് ജെസിഡബ്ല്യു എഡിഷനും എത്തിയിരിക്കുന്നത്.
ക്രോമിയം ഇന്‍സേര്‍ട്ടിന്റെ ആവരണത്തില്‍ നല്‍കിയിട്ടുള്ള ഹെക്‌സഗണ്‍ ആകൃതിയിലുള്ള റേഡിയേറ്റര്‍ ഗ്രില്‍, വലിയ ഹെഡ്‌ലൈറ്റ് ക്ലസ്റ്ററില്‍ നല്‍കിയിരിക്കുന്ന പ്രൊജക്ഷന്‍ ഹെഡ്‌ലാമ്പുമാണ് വാഹനത്തെ സ്റ്റൈലിഷാക്കുന്നത്. കേവലം 6.1 സെക്കന്റില്‍ പൂജ്യത്തില്‍ നിന്ന് 100 കിലോമീറ്റര്‍ വേഗത കൈവരിക്കാന്‍ വാഹനത്തിന് കഴിയും. മികച്ച സുരക്ഷ സംവിധാനങ്ങളും വാഹനത്തില്‍ ഒരുക്കിയിട്ടുണ്ട്.