പ്യേരെന്തെരീീീീ....!!!! മഞ്ജു വാര്യരെ ഞെട്ടിച്ച പാറു അമ്മൂമ്മ

കരിങ്കുന്നം സികസ്സസ് എന്ന ചിത്രത്തിന്റെ ഷൂട്ടിംഗിനിടയിലാണ് മഞ്ജു പാറു അമ്മൂമ്മയെ കണ്ടുമുട്ടിയത്

നവീകരിച്ച ഉസ്താദ് ഹോട്ടലിന്റെ ഉദ്ഘാടനത്തിന് നടന്‍ ആസിഫലിയെ കണ്ട് കുഞ്ചാക്കോ ബോബനല്ലേ എന്നു ചോദിക്കുന്ന മാമുക്കോയയുടെ കഥാപാത്രത്തെ ആരും മറക്കില്ല, അത്ര നിഷ്ക്കളങ്കമായിട്ടായിരുന്നു ആ ചോദ്യം. മലയാളത്തിന്റെ ലേഡി സൂപ്പര്‍സ്റ്റാര്‍ മഞ്ജു വാര്യര്‍ക്കും ഈയിടെ അങ്ങിനെയൊരു പറ്റുപറ്റി. മഞ്ജു വോളിബോള്‍ കോച്ചായി അഭിനയിക്കുന്ന കരിങ്കുന്നം സിക്സസ് എന്ന ചിത്രത്തിന്റെ ഷൂട്ടിംഗിനിടയില്‍ വച്ചായിരുന്നു സംഭവം. ഷൂട്ടിംഗ് കാണാന്‍ വന്ന പാറു എന്ന അമ്മൂമ്മയെ ചേര്‍ത്തു പിടിച്ച് ഫോട്ടോയും എടുത്ത് തിരികെ പോകാന്‍ നേരമാണ് മഞ്ജുവിനോടായി പാറു അമ്മൂമ്മയുടെ തിരുവനന്തപുരം ശൈലിയില്‍ ഒരു ചോദ്യം പേരെന്തിരി എന്ന്. പകച്ചുപോകുകയല്ല,പകരം ചിരിച്ചുപോകുകയായിരുന്നു ഞാന്‍ എന്ന് മഞ്ജു എന്നു പറയുന്നു.

മഞ്ജുവിന്റെ ഫേസ്ബുക്ക് പോസ്റ്റ് വായിക്കാം

ഇപ്പോള്‍ അഭിനയിക്കുന്നത് കരിങ്കുന്നം സിക്‌സസ് എന്ന ചിത്രത്തിലാണ്. തിരുവനന്തപുരം എസ്.യു.ടി ആശുപത്രിയിലായിരുന്നു കഴിഞ്ഞ ദിവസം ഷൂട്ടിങ്. ചുറ്റും കാഴ്ചക്കാരുടെ തിരക്കുണ്ട്. അതിനിടയിലാണ് തനി നാട്ടിന്‍പുറത്തുകാരിയായ ഒരമ്മൂമ്മ കാണാന്‍ വന്നത്. നല്ലപ്രായമുണ്ട്. ലുങ്കിയും ബ്ലൗസും തോര്‍ത്തുമാണ് വേഷം. ഞാന്‍ വന്നിട്ടുണ്ടെന്നറിഞ്ഞ് കുറേ കഷ്ടപ്പെട്ടെത്തിയതാണെന്ന് ആരോ പറഞ്ഞു. അതോടെ അമ്മൂമ്മയോടുള്ള ഇഷ്ടം കൂടി. ചേര്‍ത്തുനിര്‍ത്തി ഫോട്ടോയെടുത്തു. ഞാന്‍ വിശേഷമൊക്കെ ചോദിച്ചു. പാറുവെന്നാണ് പേര്. അമ്മൂമ്മയ്ക്ക് നല്ലപോലെ യോജിക്കുന്ന പേര്. പോകാന്‍ നേരം പാറു അമ്മൂമ്മ എന്നോട് ചോദിച്ചു..
പ്യേരെന്തെരീീീീ....!!!!
പകച്ചുപോകുകയല്ല,പകരം ചിരിച്ചുപോകുകയായിരുന്നു ഞാന്‍...
സിനിമാതാരങ്ങളെ എല്ലാവരും അറിയുമെന്ന ധാരണയെ ഒറ്റച്ചോദ്യത്തിലൂടെ തിരുത്തിക്കളഞ്ഞ പാറു അമ്മൂമ്മയ്ക്ക് സലാം.