മാസ് ലുക്കില്‍ മോഹന്‍ലാല്‍; വില്ലന്റെ ടീസര്‍ കാണാം
മിസ്റ്റര്‍ ഫ്രോഡിന് ശേഷം ബി. ഉണ്ണികൃഷ്ണനും ലാലും ഒരുമിക്കുന്ന ചിത്രം കൂടിയാണ് വില്ലന്‍
സാള്‍ട്ട് ആന്‍ഡ് പെപ്പര്‍ ലുക്കില്‍ മോഹന്‍ലാല്‍, തകര്‍പ്പന്‍ ആക്ഷന്‍ രംഗങ്ങള്‍. ഇന്ന് പുറത്തിറങ്ങിയ വില്ലന്റെ ടീസര്‍ എന്തുകൊണ്ടും ലാല്‍ ആരാധകരെ തൃപ്തിപ്പെടുത്തുന്നതാണ്. ഒരു മിനിറ്റ് ദൈര്‍ഘ്യമുള്ള ടീസര്‍ പുറത്തിറങ്ങി മണിക്കൂറുകള്‍ക്കുള്ളില്‍ തന്നെ കാഴ്ചക്കാരെ കൂട്ടിയിട്ടുണ്ട്. ലാലിനെ കൂടാതെ സിദ്ധിഖ്, രണ്‍ജി പണിക്കര്‍, മഞ്ജു വാര്യര്‍ എന്നിവരാണ് ടീസറിലുള്ളത്.
മിസ്റ്റര്‍ ഫ്രോഡിന് ശേഷം ബി. ഉണ്ണികൃഷ്ണനും ലാലും ഒരുമിക്കുന്ന ചിത്രം കൂടിയാണ് വില്ലന്‍. 8 കെ റസല്യൂഷനിലാണ് ചിത്രം ഒരുങ്ങുന്നത്. ഇന്ത്യന്‍ സിനിമാ ചരിത്രത്തില്‍ ആദ്യമായിട്ടാണ് ഒരു സിനിമ പൂര്‍ണ്ണമായും 8 കെ റസല്യൂഷനില്‍ ചിത്രീകരിക്കുന്നത്. പ്രശസ്ത തമിഴ് സിനിമാറ്റോഗ്രാഫര്‍ മനോജ് പരമഹംസയാണ് ചിത്രത്തിന് വേണ്ടി ക്യാമറ ചലിപ്പിക്കുന്നത്. ഉണ്ണികൃഷ്ണന്‍ തന്നെയാണ് ചിത്രത്തിന്റെ തിരക്കഥ, റോക്ക്ലൈന്‍ വെങ്കിടേഷ് ആണ് ചിത്രം നിര്‍മ്മിക്കുന്നത്. ഫോര്‍ മ്യൂസിക് ആണ് സംഗീതം.
മഞ്ജു വാര്യര്‍ അടക്കം ഒരു വന്‍താരനിര തന്നെ ചിത്രത്തില്‍ അണിനിരക്കുന്നുണ്ട്. ലാലിന്റെ ഭാര്യയായിട്ടാണ് മഞ്ജു വാര്യര്‍ ചിത്രത്തില്‍ അഭിനയിക്കുന്നത്. തമിഴില്‍ നിന്നും വിശാല്‍, ഹന്‍സിക എന്നിവരും അജു വര്‍ഗീസ്, ചെമ്പന്‍ വിനോദ്, വിനായകന്‍, കോട്ടയം നസീര്‍, ഇടവേള ബാബു എന്നിവരും ചിത്രത്തില്‍ അഭിനയിക്കുന്നുണ്ട്. ജൂലൈ 21നാണ് വില്ലന്‍ തിയറ്ററുകളിലെത്തുന്നത്.