കരളില്‍ പ്രണയം നിറയ്ക്കുന്ന പാട്ടുകളുമായി കിസ്മത്ത്

പ്രമുഖ മ്യൂസിക് ലേബല്‍ ആയ മ്യൂസിക്247 ആണ് കിസ്മത്തിലെ ഗാനങ്ങള്‍ റിലീസ് ചെയ്തത്

പ്രണയത്തില്‍ നിറച്ച പാട്ടുകളുമായി കിസ്മത്ത് പ്രദര്‍ശനത്തിനൊരുങ്ങുന്നു. കിസ പാതിയില്‍, നിളമണല്‍തരികളില്‍ തുടങ്ങി ഏഴ് പാട്ടുകളാണ് ചിത്രത്തിലുള്ളത്. പ്രമുഖ മ്യൂസിക് ലേബല്‍ ആയ മ്യൂസിക്247 ആണ് കിസ്മത്തിലെ ഗാനങ്ങള്‍ റിലീസ് ചെയ്തത്. മഹാകവി മോയിന്‍കുട്ടി വൈദ്യര്‍, അൻവർ അലി,റഫീഖ് അഹമ്മദ് എന്നിവരുടെ വരികൾക്ക് സുമേഷ് പരമേശ്വർ, ഷമേജ് ശ്രീധർ, സുഷിൻ ശ്യാം എന്നിവർ ഈണം പകര്‍ന്നിരിക്കുന്നു.

നവാഗതനായ ഷാനവാസ് കെ. ബാവക്കുട്ടി കഥയും തിരക്കഥയും ഒരുക്കി സംവിധാനം ചെയ്യുന്ന 'കിസ്മത്ത്', ഇർഫാൻ എന്ന ഇരുപത്തിമൂന്നുകാരൻ മുസ്ലിം യുവാവിന്റെയും ഇരുപത്തെട്ടുകാരി അനിത എന്ന ദളിത് യുവതിയുടെയും പ്രണയകഥയാണ്. ഷെയിൻ നിഗമും ശ്രുതി മേനോനുമാണ് കേന്ദ്ര കഥാപാത്രങ്ങളെ അവതരിപ്പിക്കുന്നത്. 2011ൽ പൊന്നാനിയിൽ നടന്ന യഥാർത്ഥ സംഭവങ്ങളെ ആസ്പദമാക്കി നിര്‍മ്മിച്ചിരിക്കുന്ന ഈ ചിത്രത്തില്‍ വിനയ് ഫോർട്ടും ഒരു പ്രധാന വേഷത്തിലെത്തുന്നു. പി. ബാലചന്ദ്രൻ, സുനിൽ സുഖദ, അലൻസിയർ ലെ, സജിത മഠത്തിൽ, ജയപ്രകാശ് കുളൂർ, ബിനോയ്‌ നമ്പാല, സുരഭി ലക്ഷ്മി, അനിൽ നെടുമങ്ങാട്, ശ്രീകാന്ത് മേനോൻ, വിജയൻ കാരന്തൂർ തുടങ്ങിയവരും താരനിരയിൽ അണിനിരക്കുന്നു. ഛായാഗ്രഹണം സുരേഷ് രാജനും ചിത്രസംയോജനം ബി. അജിത് കുമാറും ജിതിൻ മനോഹറുമാണ് നിർവഹിച്ചിരിക്കുന്നത്. പശ്ചാത്തല സംഗീതം സുഷിൻ ശ്യാമിന്റെതാണ്.പട്ടം സിനിമ കമ്പനിയുടെ ബാനറിൽ ശൈലജ മണികണ്ഠൻ നിർമ്മിച്ച 'കിസ്മത്ത്'പ്രദർശനത്തിനെത്തിക്കുന്നത്എൽ ജെ ഫിലിംസ് പ്രൈവറ്റ് ലിമിറ്റഡ് ആണ്. ജൂലൈ 29ന് ചിത്രം തീയറ്ററുകളിലെത്തും.