സെക്‌സ് റാക്കറ്റ്: നടിയും കാസ്റ്റിങ് ഡയറക്ടറുമായ ആരതി മിത്തല്‍ അറസ്റ്റില്‍

മുംബൈ: നടിയും കാസ്റ്റിങ് ഡയറക്ടറുമായ ആരതി മിത്തല്‍ അറസ്റ്റില്‍. സെക്സ് റാക്കറ്റ് നടത്തിയതിനാണ് അറസ്റ്റെന്ന് മുംബൈ പൊലീസിനെ ഉദ്ധരിച്ച് വാര്‍ത്താഏജന്‍സിയായ എഎന്‍ഐ റിപ്പോര്‍ട്ട് ചെയ്തു.

ഗോരെഗാവ് മേഖലയിലെ പെണ്‍വാണിഭ സംഘത്തിനെതിരെയാണ് ദിന്‍ദോഷി പൊലീസ് നടപടിയെടുത്തത്. ഇവിടെ നിന്ന് രണ്ട് മോഡലുകളെ രക്ഷപ്പെടുത്തി.

ഇൻസ്പെക്ടർ മനോജ് സുതാറിന് ലഭിച്ച വിവരത്തെ തുടര്‍ന്നായിരുന്നു അന്വേഷണമെന്ന് മിഡ് ഡേ റിപ്പോര്‍ട്ട് ചെയ്തു. തുടര്‍ന്ന് കസ്റ്റമര്‍ എന്ന വ്യാജേന ആരതി മിത്തലിനെ സമീപിച്ചു. ആരതി മിത്തല്‍ രണ്ടു മോഡലുകളുടെ ഫോട്ടോ ഇന്‍സ്പെക്ടറുടെ ഫോണിലേക്ക് അയച്ചു. 60,000 രൂപയാണ് ആവശ്യപ്പെട്ടത്. ധാരണയിലെത്തിയ പ്രകാരം ഹോട്ടലിലേക്ക് രണ്ടു മോഡലുകള്‍ക്കൊപ്പം ആരതി മിത്തല്‍ എത്തി. പൊലീസ് ഏര്‍പ്പാടാക്കിയ രണ്ടു ഡമ്മി കസ്റ്റമേഴ്സ് ഹോട്ടലില്‍ കാത്തുനിന്നു. പൊലീസും സ്ഥലത്തെത്തി. തുടര്‍ന്നായിരുന്നു അറസ്റ്റ്.

സെക്ഷന്‍ 370 ഉള്‍പ്പെടെയുള്ള വകുപ്പുകള്‍ ചുമത്തിയാണ് ആരതി മിത്തലിനെ അറസ്റ്റ് ചെയ്തത്. പെണ്‍കുട്ടികളെ കടത്തി എന്നത് ഉള്‍പ്പെടെയുള്ള കുറ്റങ്ങള്‍ ചുമത്തി. കേസ് കൂടുതൽ അന്വേഷണത്തിനായി യൂണിറ്റ് 11 ക്രൈംബ്രാഞ്ചിന് കൈമാറി.

Summary- casting director and actress named Aarti Mittal has been arrested for allegedly running sex racket in the film industry