കാത്തിരിപ്പിന് അവസാനം, മോഹന്‍ലാലിന്‍റെ 'മോണ്‍സ്റ്റര്‍' വരുന്നത് ദീപാവലിക്ക്
ആറാട്ടിന് ശേഷം തിയറ്ററുകളിലെത്തുന്ന മോഹന്‍ലാല്‍ ചിത്രമാണ് 'മോണ്‍സ്റ്റര്‍'
Update: 2022-09-18 10:28 GMT
വലിയ ഇടവേളകള്‍ക്കു ശേഷം ഒരു മോഹന്‍ലാല്‍ ചിത്രം തിയറ്ററുകളിലെത്തുന്നു. പുലിമുരുകന് ശേഷം വൈശാഖ് സംവിധാനം ചെയ്യുന്ന സസ്പെന്‍സ് ത്രില്ലര്‍ ചിത്രം മോണ്‍സ്റ്റര്‍ ആണ് ദീപാവലി റിലീസ് ആയി എത്തുന്നത്. ഒക്ടോബര്‍ 21നാണ് ചിത്രം തിയറ്ററുകളിലെത്തുക. ആറാട്ടിന് ശേഷം തിയറ്ററുകളിലെത്തുന്ന മോഹന്‍ലാല്‍ ചിത്രമാണ് 'മോണ്‍സ്റ്റര്‍'. ചിത്രത്തിന്റെ റിലീസുമായി ബന്ധപ്പെട്ട ഔദ്യോഗിക അറിയിപ്പ് വൈകാതെ തന്നെയുണ്ടാകും.
ലക്കി സിങ് എന്ന കഥാപാത്രമായാണ് മോഹന്‍ലാല്‍ 'മോണ്‍സ്റ്ററില്‍' എത്തുന്നത്. തെലുങ്ക് നടന്‍ മോഹന്‍ബാബുവിന്‍റെ മകളും നടിയുമായ ലക്ഷ്മി മഞ്ജുവാണ് നായിക. ലക്ഷ്മിയുടെ ആദ്യ മലയാള സിനിമ കൂടിയാണിത്. ആന്‍റണി പെരുമ്പാവൂരാണ് ചിത്രം നിര്‍മ്മിക്കുന്നത്. ഉദയ് കൃഷ്ണയാണ് മോണ്‍സ്റ്ററിന്‍റെ തിരക്കഥ ഒരുക്കിയത്.സതീശ് കുറുപ്പാണ് ഛായാഗ്രഹണം. എഡിറ്റിങ്-ഷമീര്‍ മുഹമ്മദ്. സംഗീതം-ദീപക് ദേവ്. കലാസംവിധാനം-ഷാജി നടുവില്‍. ആക്ഷന്‍-സ്റ്റഡ് സില്‍വ. പുലിമുരുകന്‍റെ വലിയ വിജയത്തിന് ശേഷം അതെ ടീമില്‍ നിന്നും പുറത്തിറങ്ങുന്ന പുതിയ ചിത്രത്തെ കുറിച്ച് വലിയ പ്രതീക്ഷയിലാണ് ആരാധകര്‍.