കഠിനമായ ആർത്തവ വേദന അവഗണിക്കരുത്; എൻഡോമെട്രിയോസിസ് രോഗാവസ്ഥയെക്കുറിച്ച് നടി ലിയോണ ലിഷോയ്

ചെറുതും വലുതുമായ വേഷങ്ങളിലൂടെ മലയാള സിനിമയിലെ സ്ഥിരം സാന്നിധ്യമായ നടിയാണ് ലിയോണ ലിഷോയ്. മോഹന്‍ലാല്‍ നായകനായ ട്വല്‍ത്ത് മാനാണ് നടി ഒടുവില്‍ അഭിനയിച്ച ചിത്രം. ഇപ്പോഴിതാ എൻഡോമെട്രിയോസിസ് രോഗാവസ്ഥയെക്കുറിച്ചുള്ള വിവരങ്ങള്‍ പങ്കുവച്ചിരിക്കുകയാണ് താരം.

ലിയോണയുടെ കുറിപ്പ്

ജീവിതം സുന്ദരമാണ്...ചിലപ്പോള്‍ വേദനാജനകവും. മിക്കപ്പോഴും ഇതു രണ്ടും നിറഞ്ഞതായിരിക്കും. രണ്ടു വര്‍ഷം മുന്‍പാണ് എനിക്ക് എൻഡോമെട്രിയോസിസ്(സ്റ്റേജ് 2) സ്ഥിരീകരിക്കുന്നത്. രണ്ട് വര്‍ഷം കഠിനമായ വേദനകളുടെ കാലമായിരുന്നു. എൻഡോമെട്രിയോസിസുമായി ജീവിക്കുന്നത് വളരെ വെല്ലുവിളി നിറഞ്ഞതും ഒരു തുടർച്ചയായ പ്രക്രിയയുമാണ്. എന്നാൽ എന്‍റെ ശാരീരികവും മാനസികവുമായ ആരോഗ്യത്തെക്കുറിച്ച് തീർത്തും അവ്യക്തതയിൽ നിന്ന് എന്‍റെ ശരീരത്തിലെയും മനസ്സിലെയും മാറ്റങ്ങൾ അംഗീകരിക്കുന്ന ഈ ഭയാനകമായ യാത്രയിൽ നിന്ന്, തീർച്ചയായും എന്‍റെ കുടുംബത്തിന്‍റെയും അടുത്ത സുഹൃത്തുക്കളുടെയും സഹായത്തോടെ, ഞാൻ ഒരുപാട് മുന്നോട്ട് പോയി എന്ന് ഞാൻ വിശ്വസിക്കുന്നു. എൻഡോമെട്രിയോസിസിന്‍റെ പ്രധാന ലക്ഷണങ്ങളിലൊന്ന് കഠിനമായ ആർത്തവ വേദനയാണ്. കഠിനമായ ആര്‍ത്തവവേദന നല്ലതല്ല. അത് സാധാരണമല്ല..ഇതു വായിക്കുന്ന സ്ത്രീകളോട് ഞാന്‍ അഭ്യര്‍ഥിക്കുന്നു..ദയവായി ഡോക്ടറെ കാണുക.

Full View

ഗർഭാശയത്തിന്‍റെ ഏറ്റവും ഉള്ളിലുള്ള സ്തരമാണ് എൻഡോമെട്രിയം.'എൻഡോമെട്രിയ' ത്തിലെ കോശങ്ങൾ ഗർഭപാത്രത്തിന് വെളിയിലായി മറ്റ് ആന്തരിക അവയവങ്ങളിൽ കാണപ്പെടുന്ന അവസ്ഥയാണ് 'എൻഡോമെട്രിയോസിസ്' എന്നറിയപ്പെടുന്നത്. ലോകത്തെ സ്ത്രീകളിൽ ഏകദേശം 6 മുതൽ 10 ശതമാനം വരെ ( ഏകദേശം 11 മില്യൺ ) എൻഡോമെട്രിയോസിസ് ബാധയുള്ളവരാണ് എന്നാണ് കണക്കാക്കപ്പെട്ടിരിക്കുന്നത്.പ്രജനന ക്ഷമതയുള്ള പ്രായത്തിലുള്ള ( reproductive age group ) സ്ത്രീകൾക്കാണ് കൂടുതലായും ലക്ഷണങ്ങൾ കണ്ടു വരുന്നത്. ആർത്തവ സമയത്ത് വസ്തി പ്രദേശത്ത് അനുഭവപ്പെടുന്ന അമിതമായ വേദന, വന്ധ്യത എന്നിവയാണ് ഈ രോഗത്തിൻറെ സർവസാധാരണമായ ലക്ഷണങ്ങൾ. ഭൂരിഭാഗം സ്ത്രീകളിലും മാസമുറയോടനുബന്ധിച്ചാണ് ഈ വേദന അനുഭവപ്പെടുന്നത്. ചുരുക്കം ചിലരിൽ സ്ഥിരമായ വേദനയായും അനുഭവപ്പെടാറുണ്ട്. ചിലരിൽ ഈ വേദന ലൈംഗികബന്ധത്തിനിടയിലോ, ശേഷമോ, മലമൂത്രവിസർജന സമയത്തോ അനുഭവപ്പെടും.