'ഹോമിലെ' ഒലിവർ ട്വിസ്റ്റിന്റെയും കുട്ടിയമ്മയുടെയും 'വിവാഹചിത്രം' ഏറ്റെടുത്ത് സോഷ്യൽ മീഡിയ

ഇന്ദ്രന്‍സ് കേന്ദ്രകഥാപാത്രത്തെ അവതരിപ്പിച്ച ചിത്രമാണ് ഹോം. ആമസോണ്‍ പ്രൈമിലൂടെ പ്രേക്ഷകരിലേക്കെത്തിയ ചിത്രത്തിന് മികച്ച പ്രതികരണമാണ് ലഭിക്കുന്നത്. ചിത്രത്തിൽ ഇന്ദ്രൻസ് അവതരിപ്പിച്ച ഒലിവർ ട്വിസ്റ്റിനെയും മഞ്ജു പിള്ള അവതരിപ്പിച്ച കുട്ടിയമ്മയെയും പ്രേക്ഷകർ ഏറ്റെടുത്ത് കഴി‍ഞ്ഞു. കുടുംബ കഥ പറയുന്ന ഫീൽ ​ഗുഡ് സിനിമയാണ് 'ഹോം'.

ഹോമിലെ കഥാപാത്രങ്ങളായ ഒലിവർ ട്വിസ്റ്റിന്റെയും കുട്ടിയമ്മയുടെയും 1997ലെ 'വിവാഹചിത്രം' ആണ് സോഷ്യൽ മീഡിയയിൽ ചർച്ചയാകുന്നത്. യഥാർഥത്തിൽ ഇന്ദ്രൻസും മഞ്ജു പിള്ളയും അഭിനയിച്ച് 1997 ൽ പുറത്തിറങ്ങിയ 'നീ വരുവോളം' എന്ന സിനിമയിലെ രം​ഗമാണിത്. സിബി മലയിൽ സംവിധാനം ചെയ്ത് ദിലീപ് നായകനും ദിവ്യ ഉണ്ണി നായികയുമായ ചിത്രമായിരുന്നു 'നീ വരുവോളം'. 

പ്രേക്ഷകരും സിനിമാരംഗത്തുള്ളവരും ഒരു പോലെ ഹോമിനെ പ്രകീര്‍ത്തിക്കുകയാണ്. ഹോം കണ്ട പ്രശസ്ത തമിഴ് സംവിധായകന്‍ എ.ആര്‍ മുരുഗദോസും ചിത്രത്തെ അഭിനന്ദിച്ച് രംഗത്തെത്തി. സംവിധായകന്‍ റോജിന്‍ തോമസിനാണ് മുരുഗദോസ് അഭിനന്ദന സന്ദേശമയച്ചത്. 

'ഗുഡ് ഈവനിംഗ് ബ്രദർ, ഇത് സംവിധായകൻ മുരുഗദോസാണ്. ഹോം കണ്ടു. അസാധ്യ സിനിമ. അഭിനന്ദനങ്ങൾ', എന്നാണ് മുരുഗദോസ് കുറിച്ചത്.

ഫിലിപ്സ് ആന്‍ഡ് മങ്കി പെന്‍, ജോ ആന്‍ഡ് ദ ബോയ് എന്നീ ചിത്രങ്ങള്‍ക്ക് ശേഷം റോജിന്‍ തോമസ് സംവിധാനം ചെയ്ത ചിത്രമാണ് ഹോം. കുടുംബ പശ്ചാത്തലത്തില്‍ ഒരുക്കിയ ചിത്രത്തില്‍ ശ്രീനാഥ് ഭാസി, നസ്‍ലെന്‍ കെ.ഗഫൂര്‍, ജോണി ആന്‍റണി എന്നിവരാണ് മറ്റ് പ്രധാന കഥാപാത്രങ്ങളെ അവതരിപ്പിക്കുന്നത്.