നാനിക്ക് പിറന്നാൾ ആശംസകൾ നേർന്ന് ബർത്ത്ഡേ സ്പെഷൽ ‌ടീസർ പുറത്തിറക്കി ടീം 'സരിപോദാ ശനിവാരം'

‌പ്രേക്ഷകരുടെ പ്രിയതാരമായ നാനിക്ക് പിറന്നാൾ ആശംസകൾ നേർന്ന് ടീം 'സരിപോദാ ശനിവാരം' ബർത്ത്ഡേ സ്പെഷൽ പോസ്റ്റർ പുറത്തിറക്കി. പോസ്റ്ററിനോടൊപ്പം ചിത്രത്തിന്റെ ടീസറും റിലീസ് ഡേറ്റും അണിയറ പ്രവർത്തകർ പുറത്തുവിട്ടിട്ടുണ്ട്.

മാസ്സ് ആക്ഷൻ രംഗങ്ങളോടെ കളർഫുളായെത്തിയ ടീസർ നാനിയുടെ കഥാപാത്രത്തിന്റെ സ്വഭാവം വ്യക്തമാക്കുന്നു. സൂര്യ എന്ന കഥാപാത്രമായി നാനി വേഷമിടുന്ന ചിത്രം ആഗസ്റ്റ് 29ന് തിയറ്ററുകളിലെത്തും.

വിവേക് ആത്രേയ സംവിധാനം ചെയ്യുന്ന ഈ ബിഗ് ബജറ്റ് ചിത്രം ഡി.വി.വി എന്റർടൈൻമെന്റിന്റെ ബാനറിൽ ഡി.വി.വി ദനയ്യയും കല്യാൺ ദാസരിയും ചേർന്നാണ് നിർമിക്കുന്നത്. തമിഴ്-തെലുങ്ക് സിനിമകളിൽ നായികയായി തിളങ്ങിയ പ്രിയങ്ക മോഹനാണ് നായിക. തമിഴ് താരം എസ്.ജെ. സൂര്യയും സുപ്രധാന വേഷം അവതരിപ്പിക്കുന്നു.

'എന്റെ സുന്ദരനികി' പോലൊരു കൾട്ട് എന്റർടെയ്‌നർ പ്രേക്ഷകർക്ക് നൽകിയ പ്രതിഭാധനനായ സംവിധായകനാണ് വിവേക് ആത്രേയ. നാനിയും വിവേകും ആദ്യമായ് ഒന്നിച്ച ഈ ചിത്രത്തിൽ വളരെ മൃദുലമായ കഥാപാത്രത്തെയാണ് നാനി അവതരിപ്പിച്ചത്. എന്നാൽ, ഈ കൂട്ടുകെട്ടിലെ രണ്ടാമത്തെ ചിത്രമായ 'സരിപോദാ ശനിവാരം'ത്തിൽ പരുക്കൻ ലുക്കിലാണ് നാനി പ്രത്യക്ഷപ്പെടുന്നത്.

തെലുങ്ക്, തമിഴ്, കന്നഡ, മലയാളം, ഹിന്ദി ഭാഷകളിലായി പുറത്തിറങ്ങുന്ന പാൻ ഇന്ത്യ സിനിമയാണിത്. ഛായാഗ്രഹണം: ജി. മുരളി, ചിത്രസംയോജനം: കാർത്തിക ശ്രീനിവാസ്, സംഗീതം: ജേക്സ് ബിജോയ്, ആക്ഷൻ: രാം-ലക്ഷ്മൺ, മാർക്കറ്റിങ്: വാൾസ് ആൻഡ് ട്രൻഡ്സ്, പി.ആർ.ഒ: ശബരി.