മരുഭൂമിയിലെ ഇടയന്‍മാര്‍ക്ക് പെരുന്നാള്‍ പുടവകള്‍ സമ്മാനിച്ച് യൂത്ത് ഫോറം
ബലിപെരുന്നാള്‍ ആഘോഷം വ്യത്യസ്തമാക്കുകയാണ് ഖത്തറിലെ ഒരു കൂട്ടം ചെറുപ്പക്കാര്‍
ബലി പെരുന്നാളിനോടനുബന്ധിച്ച് മരുഭൂമിയിലെ ഇടയന്‍മാര്‍ക്ക് പെരുന്നാള്‍ പുടവകള്‍ സമ്മാനിച്ച് ഈദാഘോഷം വ്യത്യസ്തമാക്കുകയാണ് ഖത്തറിലെ ഒരു കൂട്ടം ചെറുപ്പക്കാര്‍. യൂത്ത് ഫോറം പ്രവര്‍ത്തകരാണ് സൈലിയയിലെ ഇടയ കൂടാരങ്ങളിലേക്ക് പെരുന്നാള്‍ സമ്മാനവുമായെത്തിയത്.
നഗരത്തിരക്കുകളില്‍ നിന്ന് മാറി ഫോര്‍വീല്‍ വാഹനങ്ങളുമായി മരുഭൂമിയിലൂടെ സഞ്ചരിച്ചാണ് ഇവര്‍ ആട്ടിടയന്‍മാരുടെ അടുത്ത് പുതു വസ്ത്രങ്ങളുമായെത്തിയത്. പെരുന്നാള്‍ സന്തോഷങ്ങളില്‍ പങ്കുചേരാന്‍ അവസരം ലഭിക്കാത്ത ഒറ്റപ്പെട്ട ഇടയന്‍മാര്‍ക്കുള്ള വ്‌സ്ത്രങ്ങളുമായെത്തിയത് ഹിലാലിലെ യൂത്ത് ഫോറം പ്രവര്‍ത്തകരാണ്.
ഇടയന്‍മാരിലധികവും സുഡാനികളും ബംഗ്ലാദേശികളുമാണ്. കൂട്ടത്തില്‍ രാജസ്ഥാനിലെ ബാഡ്മീര്‍ മരുപ്രദേശത്തു നിന്നുള്ള ഏതാനും പേരേയും ഇവര്‍ക്കിയില്‍ കാണാനായി. ആടുകള്‍ക്കും ഒട്ടകങ്ങള്‍ക്കുമൊപ്പം കഴിഞ്ഞു കൂടുമ്പോള്‍ ആഘോഷ ദിനങ്ങളില്‍ പോലും മറന്നു പോകുന്ന ഇടയന്‍മാര്‍ക്ക് പെരുന്നാള്‍ പുടവ സമ്മാനിക്കാനെത്തിയ ചെറുപ്പക്കാരെ നിറഞ്ഞ സന്തോഷത്തോടെയാണ് ഇവര്‍ യാത്രയാക്കിയത്.