അബൂദബി വേനൽ സീസൺ ജൂലൈ 20 മുതൽ

ആഗസ്ത്​ ഇരുപത്​ വരെ നീണ്ടുനിൽക്കുന്ന ഉല്ലാസവേളയിൽ ഒട്ടേറെ വൈവിധ്യമാർന്ന പരിപാടികൾ അരങ്ങേറുമെന്ന്​ അബൂദബി വിനോദസഞ്ചാര,സാംസ്കാരിക അതോറിറ്റി അറിയിച്ചു

ഈ വർഷത്തെ അബൂദബി വേനൽ സീസൺ ജൂലൈ 20 മുതൽ ആരംഭിക്കും. ആഗസ്ത്​ ഇരുപത്​ വരെ നീണ്ടുനിൽക്കുന്ന ഉല്ലാസവേളയിൽ ഒട്ടേറെ വൈവിധ്യമാർന്ന പരിപാടികൾ അരങ്ങേറുമെന്ന്​ അബൂദബി വിനോദസഞ്ചാര,സാംസ്കാരിക അതോറിറ്റി അറിയിച്ചു.

അബൂദബി എമിറേറ്റിലെ വിവിധ വേദികൾ തദ്ദേശീയ, അന്താരാഷ്ട്ര കലാകാരന്മാർ അവതരിപ്പിക്കുന്ന പരിപാടികൾ, ശിൽപശാലകൾ, കരകൗശല വസ്​തുക്കളുടെ പ്രദർശനങ്ങൾ തുടങ്ങിയവ ഇതിന്റെ ഭാഗമായി നടക്കും.

വിവിധ രാജ്യങ്ങളിൽനിന്നും മറ്റു എമിറേറ്റുകളിൽ നിന്നും സന്ദർശകരെ അബൂദബിയിലേക്ക്​ ആകർഷിക്കുകയെന്ന ലക്ഷ്യത്തോടെയാണ്​ വേനൽമേള ഒരുക്കുന്നത്​. പ്രമുഖ കാർട്ടൂൺ കഥാപാത്രങ്ങളുടെ സംഗീത,നൃത്ത പരിപാടികൾ മറ്റൊരു ​ പ്രത്യേകതയായിരിക്കും.

സ്റ്റാൻഡ്​ അപ്​ കോമഡികൾ ഇത്തവണയും ഉൾപ്പെടുത്തിയിട്ടുണ്ട്​. 'ബല്ലേ ബല്ലേ ദ ബിഗ്​​ ഫാറ്റ്​ ഇന്ത്യൻ വെഡിങ്​' ബോളിവുഡ്​ ഷോ അബൂദബി സിറ്റിയിലും അൽ ദഫ്​റയിലുമായി അവതരിപ്പിക്കും. ഇന്ത്യൻ സ്വാതന്ത്ര്യ ദിനത്തിന്റെ ഭാഗമായി ബോളിവുഡ്​ താരങ്ങളും സംഗീതജ്ഞരും നർത്തകരും വിവിധ പരിപാടികളിൽ അണിനിരക്കും.

അബൂദബിയെ ഏറ്റവും മികച്ച വിനോദ കേന്ദ്രമാക്കുന്നതിന്​ വേണ്ടി സംഘടിപ്പിക്കുന്ന പ്രധാന പരിപാടികളി​ൽ ഒന്നാണ്​ വേനൽമേളയെന്ന്​ ഡയറക്ടർ ജനറൽ സൈഫ്​ സഈദ്​ ഗോബാഷ്​ വ്യക്തമാക്കി.