ദുബൈ പൊലീസിന് ഇനി പുതിയ മുഖം
Update: 2018-05-09 11:16 GMT
നേരത്തേ ചുവപ്പ് നിറത്തിലായിരുന്ന ദുബൈ പൊലീസിന്റെ ലോഗോയും എഴുത്തുകളും ഇനി പച്ച നിറത്തിലായിരിക്കും
ദുബൈ പൊലീസിന് ഇനി പുതിയ മുഖം. പുതിയ ലോഗോ, പുതിയ വെബ്സൈറ്റ്, മൊബൈല്‍ ആപ്ലിക്കേഷന്‍ എന്നിവ പുറത്തിറക്കിയ ദുബൈ പൊലീസ്, പട്രോളിങിന് ആ‍ഢംബര വാഹനമായ ബെന്റ്‍ലി കാറുകളും രംഗത്തിറക്കി.
നേരത്തേ ചുവപ്പ് നിറത്തിലായിരുന്ന ദുബൈ പൊലീസിന്റെ ലോഗോയും എഴുത്തുകളും ഇനി പച്ച നിറത്തിലായിരിക്കും. പച്ച നിറത്തില്‍ വെളുത്ത അക്ഷരത്തിലായിരിക്കും പൊലീസിന്റെ പതാക. സുരക്ഷ, ആശയവിനിമയം, നവീകരണം എന്നിവയായിരിക്കും പൊലീസിന്റെ മുദ്രാവാക്യങ്ങള്‍. പൊലീസ് ആസ്ഥാനത്ത് നടന്ന ചടങ്ങില്‍ കമാന്‍ഡര്‍ ഇന്‍ ചീഫ് മേജര്‍ ജനറല്‍ അബ്ദുല്ല ഖലീഫ അല്‍ മറി പുതിയ ലോഗോ മുദ്രണം ചെയ്ത പതാക ഉയര്‍ത്തി. നവീകരിച്ച വെബ്സൈറ്റും ആപ്പും പുറത്തിറക്കി. പുതിയ ലോഗോ ജനങ്ങള്‍ക്ക് പരിചയപ്പെടുത്തുന്നതിന്റെ ഭാഗമായി വിവിധ ബോധവല്‍കരണ പരിപാടികളും പൊലീസ് ആസൂത്രണം ചെയ്യുന്നുണ്ട്. ദുബൈ പൊലീസിന്റെ പട്രോളിങ് വാഹനവ്യൂഹത്തില്‍ ബെന്റ്‍ലി കാറുകളും ഇതോടൊപ്പം ഉള്‍പ്പെടുത്തി. 600 ഹോഴ്സ് പവര്‍ കരുത്തുള്ള ആഢംബരവാഹനമാണ് ബെന്റ്‍ലി ബെന്റ്യാഗ. റഡാര്‍ ഉള്‍പ്പെടെ ആധുനിക സൗകര്യങ്ങളോടെയാണ് ബെന്റലി ദുബൈ പൊലീസിന്റെ ഭാഗമാകുന്നത്.