മോദിയുടെ യു.എ.ഇ, ഒമാൻ സന്ദർശനം ഫെബ്രുവരി രണ്ടാം വാരം നടക്കും

രണ്ടിടങ്ങളിലും വിപുലമായ സ്വീകരണ പരിപാടികളാണ്​ പ്രധാനമന്ത്രിക്കു വേണ്ടി ഒരുക്കുന്നത്

ഗൾഫ്​-ഇന്ത്യ ബന്ധം മെച്ചപ്പെടുത്തുന്നതിന്റെ ഭാഗമായി പ്രധാനമന്ത്രി നരേന്ദ്ര മോദിയുടെ യു.എ.ഇ, ഒമാൻ സന്ദർശനം ഫെബ്രുവരി രണ്ടാം വാരം നടക്കും. രണ്ടിടങ്ങളിലും വിപുലമായ സ്വീകരണ പരിപാടികളാണ്​ പ്രധാനമന്ത്രിക്കു വേണ്ടി ഒരുക്കുന്നത്​.

ഇതു രണ്ടാം തവണയാണ്​ പ്രധാനമന്ത്രി മോദി യു.എ.ഇയിൽ എത്തുന്നത്​. ഫെബ്രുവരി പത്തിന്​ അബൂദബിയിൽ നടക്കുന്ന സർക്കാർ ഉച്ചകോടിയിൽ മോദി സംബന്ധിക്കും. യു.എ.ഇ നേതാക്കളുമായി അന്നേദിവസം വിശദമായ ചർച്ച നടക്കും. നേരത്തെ യു.എ.ഇ പ്രഖ്യാപിച്ച ക്ഷേത്രത്തിന്റെ തറക്കല്ലിടൽ കർമം ഫെബ്രുവരി 11ന്​ നടക്കും. അബൂദബി, ദുബൈ അതിർത്തിയായ ഗൻതൂത്തിലാണ്​ കൂറ്റൻ ക്ഷേത്രം നിർമിക്കുക. ഒമാൻ തലസ്ഥാനമായ മസ്കത്തിൽ ഫെബ്രുവരി 12ന്​ എത്തിച്ചേരുന്ന പ്രധാനമന്ത്രി ഇന്ത്യക്കാരുമായി പ്രത്യേകം സംവദിക്കും. ഇസ്രായേലുമായുള്ള അടുപ്പം ഇന്ത്യയുടെ ഗൾഫ്​ താൽപര്യങ്ങൾക്ക്​ എതിരല്ലെന്ന്​ ബോധ്യപ്പെടുത്താനായിരിക്കും സന്ദർശനവേളയിൽ പ്രധാനമന്ത്രി മുതിരുകയെന്നാണ്​ സൂചന.

2015 ആഗസ്ത്​ 16നാണ്​ നേരത്തെ നരേന്ദ്ര മോദി യു.എ.ഇ സന്ദർശിച്ചത്​. വൻ സ്വീകരണമായിരുന്നു അന്നു ലഭിച്ചത്​. തുടർന്ന്​ അബൂദബി കിരീടാവകാശി ശൈഖ്​ മുഹമ്മദ്​ ബിൻ സായിദ്​ ആൽ നഹ്​യാൻ രണ്ടു തവണ ഇന്ത്യ സന്ദർശിച്ചത്​ ഉഭയകക്ഷി ബന്ധം അരക്കിട്ടുറപ്പിക്കാൻ സഹായകമായി.