ഒമാനില്‍ ടാക്സികളില്‍ മീറ്റര്‍ ഘടിപ്പിക്കാന്‍ നീക്കം

ഇതുസംബന്ധിച്ച നിർദേശങ്ങൾ അവലോകനം ചെയ്തുവരുകയാണെന്ന്​ ഗതാഗത വാർത്താവിനിമയ മന്ത്രാലയം അറിയിച്ചു

ഒമാനിൽ സർവീസ്​ നടത്തുന്ന മുഴുവൻ ടാക്സികളിലും മീറ്റർ ഘടിപ്പിക്കുന്നത്​ ആലോചനയിൽ. ഇതുസംബന്ധിച്ച നിർദേശങ്ങൾ അവലോകനം ചെയ്തുവരുകയാണെന്ന്​ ഗതാഗത വാർത്താവിനിമയ മന്ത്രാലയം അറിയിച്ചു. മറ്റ്​ ഗൾഫ്​ രാഷ്ട്രങ്ങൾക്ക്​ സമാനമായ മീറ്റർ ടാക്സി സംവിധാനമാണ്​ സർക്കാരിന്റെ മുന്നിലുള്ളതെന്നും മന്ത്രാലയം ട്വിറ്ററിൽ അറിയിച്ചു.

ഹോട്ടലുകളിൽ നിന്നും സുൽത്താൻ ഖാബൂസ്​ തുറമുഖത്ത്​ നിന്നും നിലവിൽ സർവീസ്​ നടത്തുന്ന ടാക്സികൾ മർഹബ ടാക്സി ശൃംഖലയിലും വിമാനത്താവളത്തിൽ നിന്നും മാളുകളിൽ നിന്നും സർവീസ്​ നടത്തുന്ന ടാക്സി വാഹനങ്ങൾ മുവാസലാത്ത്​ ശൃംഖലയിലും ചേരണമെന്ന്​ മന്ത്രാലയം ആവശ്യപ്പെട്ടു. നിലവിൽ ടാക്സി നടത്തുന്നവർ ശൃംഖലയില്‍ ചേരാത്ത പക്ഷം ടാക്സികളുള്ള ഏതൊരു സ്വദേശിയെയും രണ്ട്​ കമ്പനികൾക്കും തെരഞ്ഞെടുക്കാം. ഈ നാല്​ സ്ഥലങ്ങൾക്കും പുറമെ ഓൺ കാൾ സേവനങ്ങളും ഇരു മീറ്റർ ടാക്സി കമ്പനികളും നൽകുന്നുണ്ട്​. ഔദ്യോഗിക ഉദ്​ഘാടനം നടത്തിയിട്ടില്ലെങ്കിലും മർഹബ ടാക്സി കഴിഞ്ഞയാഴ്ച മുതൽ സർവീസ്​ ആരംഭിച്ചിരുന്നു. മുവാസലാത്ത്​ ടാക്സികളും വൈകാതെ നിരത്തിലിറങ്ങും. മുവാസലാത്ത്​ ടാക്സികളും അടുത്തിടെ നടന്ന ചടങ്ങിൽ അനാവരണം ചെയ്​തിരുന്നു.

ടുറിസം അടക്കം വിവിധ മേഖലകളുടെ വളർച്ചക്ക്​ സഹായകരമായ മേഖലയാണ്​ ടാക്സി സർവീസുകളെന്ന്​ ഗതാഗത വാർത്താവിനിമയ മന്ത്രാലയം അറിയിച്ചു. സ്വദേശികൾക്ക്​ കൂടുതൽ തൊഴിലവസരങ്ങൾ ഈ മേഖലയിൽ ലഭ്യമാകും. ആപ്​ ബുക്കിങ്​ അടക്കം നൂതന സാങ്കേതിക വിദ്യകൾ നടപ്പിലാക്കുന്നത്​ വഴി ടാക്സി ഡ്രൈവർമാർക്ക്​ റോഡുകളിൽ ഉപഭോക്​താക്കളെ കാത്തുനിൽക്കേണ്ടി വരില്ല. ഇതുവഴി അവർക്ക്​ കൂടുതൽ ഉപഭോക്​താക്കളെ ലഭ്യമാവുകയും ചെയ്യും. എല്ലാം ടാക്സികളിൽ മീറ്റർ ഘടിപ്പിക്കുന്നത്​ ഉൾപ്രദേശങ്ങളിലേക്കുള്ള യാത്രക്കാർക്കും അനുഗ്രഹമാകും.