ഖത്തര്‍ ഉപരോധം മനുഷ്യാവകാശ ധ്വംസനങ്ങള്‍ക്ക് ഇടയാക്കിയതായി കനേഡിയന്‍ മനുഷ്യാവകാശ സംഘം
Update: 2018-05-28 06:12 GMT
ഖത്തറിന്റെ ക്ഷണപ്രകാരം ദോഹയിലെത്തിയ സംഘം മൂന്ന് ദിവസത്തെ വസ്തുതാന്വേഷണത്തിനു ശേഷമാണ് മാധ്യമ പ്രവര്‍ത്തകരുമായി സംസാരിച്ചത്
സൗദി സഖ്യരാജ്യങ്ങള്‍ ഖത്തറിനുമേല്‍ ഏര്‍പ്പെടുത്തിയ ഉപരോധം , വ്യാപകമായ മനുഷ്യാവകാശ ധ്വംസനങ്ങള്‍ക്കും സാമ്പത്തിക മേഖലയിലെ ആഘാതങ്ങള്‍ക്കും ഇടയാക്കിയതായി കനേഡിയന്‍ മനുഷ്യാവകാശ സംഘം . ഖത്തറിന്റെ ക്ഷണപ്രകാരം ദോഹയിലെത്തിയ സംഘം മൂന്ന് ദിവസത്തെ വസ്തുതാന്വേഷണത്തിനു ശേഷമാണ് മാധ്യമ പ്രവര്‍ത്തകരുമായി സംസാരിച്ചത് .
ദോഹയിലെ നാഷണല്‍ ഹ്യൂമണ്‍ റൈറ്റ് കമ്മീഷന്‍ ആസ്ഥാനത്ത് വെച്ച് നടന്ന വാര്‍ത്താ സമ്മേളനത്തിലാണ് കനേഡിയന്‍ ദൗത്യസംഘം ഉപരോധത്തിന്റെ കെടുതികള്‍ വിശദീകരിച്ചത് .ഉപരോധം സൃഷ്ടിച്ച മനുഷ്യാവകാശ - സാമ്പത്തിക ആഘാതങ്ങള്‍ ആഴത്തിലുള്ളതാണെന്ന് വ്യക്തമാക്കിയ സംഘം രാഷ്ട്രീയാഘാതങ്ങളല്ല തങ്ങള്‍ ഇപ്പോള്‍ പരിഗണിച്ചതെന്നും കൂട്ടിച്ചേര്‍ത്തു. പാകിസ്താനിലെ മുൻ കനേഡിയൻ ഹൈകമ്മീഷണറും ഇന്തോനേഷ്യ, ഈജിപ്ത് രാജ്യങ്ങളിലെ കാനഡ അംബാസഡറുമായിരുന്നു ഫെറി ഡി കെർക്കോവാണ് അന്വേഷണസംഘം മേധാവി . ഇബ്രാഹിം അബ്ദുൽ ഹലിം, ബുഫെൽദ്ജ ബിൻ അബ്ദുല്ല, ഡോ. മാർട്ടിൻ ബൻടൻ, യാസർ ദൗബ്, തുടങ്ങിയവരാണ് സംഘാംഗങ്ങള്‍. മൂന്നു ദിവസമായി ഖത്തറിലെ യൂനിവേഴ്സിറ്റി വിദ്യാർഥികൾ, മാധ്യമപ്രവര്‍ത്തകര്‍, വനിതകൾ എന്നിവരില്‍ നിന്നെല്ലാം സംഘം തെളിവെടുപ്പ് നടത്തി.
ഒരു ഖത്തർ സ്വദേശി പോലും ഉപരോധരാജ്യങ്ങൾക്കെതിരെ സൈനികമായ നടപടികൾ വേണമെന്ന് ആവശ്യപ്പെട്ടിട്ടില്ല. ഉപരോധ രാജ്യങ്ങളിലുള്ള തങ്ങളുടെ കുടുംബാംഗങ്ങളെ കാണാനാവാത്തതിന്റെ പ്രയാസം പങ്കുവെച്ച സ്വദേശികള്‍ എത്രയും പെട്ടെന്ന് ഉപരോധം അവസാനിക്കണമെന്ന അഭിപ്രായക്കാരാണ് . ഖത്തര്‍ എയര്‍വെയ്‌സ് അടക്കമുള്ള വന്‍കിട കമ്പനികളുടെ ഉടമകളായ ഖത്തര്‍ ആളോഹരി വരുമാനത്തിലും ഏറെ മുന്നിലാണ് എന്നാല്‍ ആളുകള്‍ അനുഭവിക്കുന്ന പ്രയാസങ്ങള്‍ വലുതാണെന്നാണ് മനസിലാവുന്നത് . കനേഡിയന്‍ സര്‍ക്കാരിന്റെ ഔദ്യാഗിക നിലപാടല്ല തങ്ങള്‍ പറയുന്നതെങ്കിലും മനുഷ്യാവകാശ ലംഘനങ്ങളില്‍ തങ്ങള്‍ക്ക് ആശങ്കയുണ്ടെന്നും ഗള്‍ഫ് മേഖലയുമായി അടുത്തബന്ധം ആഗ്രഹിക്കുന്ന രാജ്യമാണ് തങ്ങളുടെതെന്നും കനേഡിയന്‍ സംഘം പറഞ്ഞു. ഖത്തര്‍ മനുഷ്യാവകാശ കമ്മീഷന്‍ ക്ഷണം സ്വീകരിച്ചെത്തിയ സംഘത്തെ ഉപരോധ രാജ്യങ്ങള്‍ ഇതുവരെ ക്ഷണിച്ചിട്ടില്ല.