കോവിഡ്​ നിയമ ലംഘനം: ബഹ്‌റൈനില്‍ പള്ളി അടച്ചിടാൻ ഉത്തരവ്​

കോവിഡ്​ നിയമം ലംഘിച്ച രണ്ട്​ പള്ളികളിലൊന്ന്​ അടച്ചിടാൻ നീതിന്യായ, ഇസ്​ലാമിക കാര്യ, ഔഖാഫ്​ മന്ത്രാലയം നിർദേശം നൽകി. ദക്ഷിണ മേഖല ഗവർണറേറ്റിലെ രണ്ട്​ പള്ളികളിലാണ്​ നിയമ ലംഘനം കണ്ടെത്തിയത്​. പൊതു സുരക്ഷയോടൊപ്പം ആരാധനക്കെത്തുന്നവരുടെ ആരോഗ്യം കൂടി സംരക്ഷിക്കുന്നതിന്‍റെ ഭാഗമായി പള്ളികളിൽ പാലിക്കേണ്ട കാര്യങ്ങളെക്കുറിച്ച്​ അറിയിപ്പ്​ നൽകിയിരുന്നു. ഇവ പാലിക്കുന്നതിന്​ എല്ലാ ആരാധനാലയങ്ങളും ജാഗ്രത പാലിക്കണമെന്ന്​ അധികൃതർ വ്യക്​തമാക്കി.

ഒരാഴ്ചത്തേക്കാണ്​ പള്ളിയിൽ ആരാധനാ വിലക്കേർപ്പെടുത്തിയിട്ടുള്ളത്​. ആവശ്യമായ ഒരുക്കങ്ങൾക്ക്​ ശേഷമേ പള്ളി തുറക്കുകളയുള്ളൂ. രണ്ട്​ പള്ളികളുടെയും ഉത്തരവാദപ്പെട്ടവർക്ക്​ നോട്ടീസ്​ നൽകാനും തീരുമാനിച്ചിട്ടുണ്ട്​. പള്ളികളിൽ കയറുന്നവർ നിർബന്ധമായും ബിവെയർ ആപ്പിലെ ഗ്രീൻ അലർട്ട്​ കാണിക്കുക, ആരാധനാലയങ്ങളിൽ കയറുന്നതിന്​ മുമ്പ്​ തെർമൽ ചെക്കപ്പിന്​ വിധേയമാവുക. ആരാധനലായങ്ങളിൽ കഴിയുന്ന മുഴുവൻ സമയത്തും മാസ്​ക്​ ധരിക്കുക. മാസ്​കില്ലാതെ പള്ളിയിൽ കയറാൻ അനുവാദമുണ്ടായിരിക്കുന്നതല്ല.

നിർണിയിച്ചിട്ടുള്ള സാമൂഹിക അകലം പാലിക്കുക. നമസ്​കാരത്തിനെത്തുന്നവർ പള്ളികളിൽ അനുവദിക്കപ്പെട്ട സമയത്തേക്കാൾ അധികം ചെലവഴിക്കാതിരിക്കുക. നമസ്​കാരം കഴിഞ്ഞയുടൻ പള്ളികൾ അടക്കുക തുടങ്ങിയ നിർദേശങ്ങൾ പാലിക്കണമെന്നാണ്​ വ്യവസ്​ഥ. എല്ലാ പള്ളികളും പ്രസ്​തുത നിർദേശങ്ങൾ പാലിക്കുന്നുവെന്ന്​ ഉറപ്പാക്കുന്നതിനാവശ്യമായ നടപടികൾ സ്വീകരിക്കു​മെന്നും അധികൃതർ അറിയിച്ചു.