ഒളിമ്പിക് കൗൺസിൽ ഓഫ് ഏഷ്യയുടെ പുതിയ പ്രസിഡന്റിന് അഭിനന്ദനങ്ങളുമായി കുവൈത്ത്

ഒളിമ്പിക് കൗൺസിൽ ഓഫ് ഏഷ്യയുടെ പുതിയ പ്രസിഡന്റായി തിരഞ്ഞെടുത്ത ഷെയ്ഖ് തലാൽ ഫഹദ് അൽ-അഹമ്മദ് അൽ-സബാഹിന് അഭിനന്ദനങ്ങളുമായി കുവൈത്ത്.

ഷെയ്ഖ് തലാലിന്‍റെ നേട്ടങ്ങളും കായിക രംഗത്തെ സംഭാവനകളും വളരെയധികം വിലമതിക്കപ്പെടുന്നുവെന്നും പുതിയ പദവിയിൽ അദ്ദേഹത്തിന് ആശംസകൾ നേരുന്നുവെന്നും കുവൈത്ത് അമീര്‍ ഷെയ്ഖ് നവാഫ് അഹമ്മദ് അൽ ജാബർ അൽ സബാഹ് പറഞ്ഞു.

കിരീടാവകാശിയും പ്രധാനമന്ത്രിയും പ്രതിരോധ മന്ത്രിയും ആഭ്യന്തര മന്ത്രിയും അദ്ദേഹത്തിന് ആശംസകള്‍ നേര്‍ന്നു. കഴിഞ്ഞ ദിവസം ബാങ്കോക്കിൽ നടന്ന ജനറൽ അസംബ്ലിയിലാണ് ഷെയ്ഖ് തലാൽ ഫഹദിനെ ഒസിഎ തലവനായി തിരഞ്ഞെടുത്തത്.

കുവൈത്തി സ്വദേശിയും വേൾഡ് അക്വാട്ടിക്‌സിന്റെ പ്രസിഡണ്ടുമായ ഹുസൈൻ അൽ മുസല്ലമിനെയാണ് ഷെയ്ഖ് തലാൽ പരാജയപ്പെടുത്തിയത്. സഹോദരനായ ഷെയ്ഖ് അഹ്മദ് ഫഹദിന്‍റെ പിന്‍ഗാമിയായാണ്‌ ഷെയ്ഖ് തലാൽ ഫഹദ് ചുമതലയെല്‍ക്കുന്നത്.

 ഒസിഎയുടെ ആദ്യ പ്രസിഡന്റ് ഷെയ്ഖ് ഫഹദ് അൽ അഹമ്മദ് അൽ ജാബർ അൽ സബാഹ് ഇദ്ധേഹത്തിന്‍റെ പിതാവാണ്. ഷെയ്ഖ് തലാലിന്‍റെ സ്ഥാനലബ്ടിയോടെ രാജ്യത്തെ കായിക രംഗത്തും മികച്ച നേട്ടം കൈവരിക്കാനാകുമെന്നാണ് പ്രതീക്ഷ.