യുഎഇയില്‍ പ്രവാസികള്‍ എന്തൊക്കെ ശ്രദ്ധിക്കണം? മാർഗരേഖയുമായി ഇന്ത്യൻ കോൺസുലേറ്റ്​

യുഎഇയിലെ ഇന്ത്യൻ പ്രവാസികൾ ശ്രദ്ധിക്കേണ്ട മാർഗനിർദേശങ്ങൾ ദുബൈ ഇന്ത്യൻ കോൺസുലേറ്റ്​ പുറത്തിറക്കി. അനുവദനീയമായതും അല്ലാത്തതുമായ കാര്യങ്ങളാണ്​ ഇതിൽ പ്രത്യേകം പരാമർശിക്കുന്നത്. പ്രവാസി ഭാരതീയ സഹായതാ കേന്ദ്രമാണ്​ 17 ഇന നിർദേശങ്ങൾ പുറത്തിറക്കിയത്​.

സാധാരണ പ്രവാസികളെ സഹായിക്കുന്നതിനുള്ള കേന്ദ്ര സർക്കാറിന്റെ ക്ഷേമ സംരംഭമാണ്​ പ്രവാസി ഭാരതീയ സഹായതാ കേന്ദ്രം. പ്രവാസികൾ അനുഭവിക്കുന്ന വിവിധ പ്രശ്​നങ്ങൾ മുൻനിർത്തിയും യുഎഇയിലെ ജീവിതം മികച്ചതാക്കി മാറ്റാന്‍ ലക്ഷ്യമിട്ടുമാണ്​ വിധിവിലക്കുകൾ തയാറാക്കിയിരിക്കുന്നതെന്ന് ​കോൺസുലേറ്റ്​ അറിയിച്ചു.

യുഎഇയിലെ തൊഴിൽനിയമത്തെ കുറിച്ചുള്ള അവബോധം എല്ലാവർക്കും ഉണ്ടായിരിക്കണമെന്ന്​ മാർഗരേഖ വ്യക്തമാക്കുന്നു. അടിയന്തര സ്വഭാവത്തിലുള്ള ടെലഫോൺ നമ്പറുകൾ എല്ലാവരുടെ പക്കലും വേണം. തൊഴിലിടങ്ങളിലെ മാനസിക, ശാരീരിക പീ​ഡനങ്ങൾ കൃത്യസമയത്ത്​ ബന്ധപ്പെട്ടവരെ അറിയിക്കണം. ജോലിയുമായി ബന്ധപ്പെട്ട പരാതികൾ തൊഴിൽ പെർമിറ്റ്​ കാൻസൽ ചെയ്യുന്നതിനുമുമ്പ്​ മന്ത്രാലയത്തെ അറിയിച്ചിരിക്കണം.

പണം സ്വീകരിക്കാനും അയക്കാനും നിയമപരമായ സംവിധാനങ്ങൾ മാത്രം ഉപയോഗിക്കണമെന്നും ജോലിയുടെ തുടക്കം മുതൽ പെൻഷൻ പദ്ധതിയിൽ ഭാഗമാകണമെന്നും മാർഗരേഖ നിർദേശിക്കുന്നു. തട്ടിപ്പുകൾക്കെതിരെ ജാഗ്രത പുലർത്താനും ​പ്രവാസികൾ ശ്രദ്ധിക്കണം. സമൂഹമാധ്യമങ്ങളിലെ ഇടപെടലുകൾ മാന്യവും നിയമാനുസൃതവും ആയിരിക്കണം. മറ്റുള്ളവരുടെ  വികാരത്തെ വൃണപ്പെടുത്തുന്ന രീതിയിൽ മതപരമായ കാര്യങ്ങൾ സമൂഹമാധ്യമങ്ങളിൽ പോസ്​റ്റ്​ ചെയ്യരുത്​. നിയന്ത്രണമുള്ള സ്​ഥലങ്ങളിൽ ഫോ​ട്ടോ എടുക്കരുതെന്നും വ്യക്​തികളുടെ​ ഫോ​ട്ടോ അനുവാദമില്ലാതെ പോസ്​റ്റ്​ ചെയ്യരുതെന്നും മാർഗരേഖയിലുണ്ട്​.